काठमाडौं । नेपालमै धेरै शाखा सञ्जाल भएको नेपाल लाइफ इन्स्योरेन्स कम्पनीले पोखरामा ब्रान्च म्यानेजर्स कन्फरेन्स एण्ड एजेन्सी फ्यालिसिटेशन प्रोग्राम २०७६ भव्यताका साथ सम्पन्न गरेको छ ।
भदौ २१ देखि २४ गतेसम्म सञ्चालित उक्त कार्यक्रम एजेन्ट, एजेन्सी म्यानेजर, शाखा कार्यालय, उपशाखा कार्यालयलगायतका उत्कृष्ट कार्यसम्पादन गर्ने व्यक्ति तथा कर्मचारीलाई नगदसहित पुरस्कृत गर्दै सम्पन्न भएको कम्पनीले जनाएको छ । कार्यक्रममा विभिन्न प्रेरणादायी र मनोरन्जनात्मक कार्यक्रम पनि सञ्चालन गरिएको थियो । देशभरिका एजेन्ट, एजेन्सी म्यानेजर, क्षेत्रीय कार्यालय, शाखा कार्यालय, उपशाखा कार्यालयलगायतका कर्मचारीहरूको उपस्थिति रहेको उक्त कार्यक्रममा एजेन्टतर्फ ५० र एजेन्सी म्यानेजरतर्फ ५० जनालाई नगदसहित पुरस्कृत गरिएको बताइएको छ । त्यसैगरी कम्पनीले उत्कृष्ट कार्यसम्पादन गर्ने आफ्ना कर्मचारीहरूलाई पनि सम्मान गरेको छ ।
कार्यक्रममा एजेन्सी म्यानेजरतर्फको एजेन्सी म्यानेजर अफ इयर अवार्डका लागि पहिलो हुने बिर्तामोड शाखाकी निर्मला खत्रीले ३ लाख ३३ हजार नगदसहित सम्मानपत्र, दोस्रो हुने नयाँ बानेश्वर शाखाकी दुर्गाकुमारी खत्रीले १ लाख ८० हजार नगदसहित सम्मानपत्र र तेस्रो हुने बिर्तामोड शाखाकै वेदनारायण गोदारले १ लाख नगदसहित सम्मानपत्र हात पार्न सफल भएका थिए ।
त्यस्तै, एजेन्टतर्फको एजेन्ट अफ द इयर अवार्डका लागि नयाँ बानेश्वर शाखाका अच्युत पौडेलले ३ लाख ३३ हजार नगदसहित पहिलो स्थान, बिर्तामोड शाखाकी प्रमिला बस्नेतले १ लाख ८० हजार नगदसहित दोस्रो स्थान, र बूढानीलकण्ठ शाखाका नैनबहादुर खत्रीले १ लाख नगदसहित तेस्रो स्थान हासिल गरेका छन् ।
यसैगरी, वेष्ट पर्फमेन्स अफ द इयर अवार्ड विर्तामोड शाखाका अमेन्द्र कुमार कर्ण र वेस्ट रिजनल म्यानेजर अफ द इयर अवार्ड पूर्वाञ्चल क्षेत्रीय कार्यालयका क्षेत्रीय प्रबन्धक टीकादत्त प्याकुरेल सम्मानित भएका छन् ।
नेपालको जीवन बिमा बजारको एक तिहाई हिस्सा ओगटेको यस कम्पनीले आफ्ना कर्मचारी तथा एजेन्टहरूलाई प्रोत्साहन गर्न हरेक वर्ष यस्ता सम्मान तथा उत्प्रेरण मूलक कार्यक्रमहरु गर्दै आएको छ । कम्पनीका प्रमुख कार्यकारी अधिकृत विवेक झाका अनुसार नेपाल लाइफले समय सापेक्ष छिटो–छरितो, सरल र सहज रुपमा सेवा प्रदान गर्नको लागि प्रविधि मैत्री बिमा कारोबार अघि बढाउने भएको छ।
बिमा क्षेत्रकै सर्वाधिक ५ अर्ब ४९ करोड यस बीमा कम्पनीको चुक्तापूँजी रहेको छ भने लगानी ७२ अर्ब रुपैयाँ रहेको जनाइएको छ। त्यस्तै, कम्पनीको जीवन बिमा कोष ६७ अर्ब रुपैयाँ रहेको छ । स्वदेश र विदेश गरी २६ लाख ३० हजार बढि व्यक्ति यस कम्पनीमा बीमित भइसकेका छन् ।