काठमाडौं । ट्रंकलाइनको विवादित महशुलको विषयलाई लिएर नेपाल विद्युत प्राधिकरणले पुनः उद्योगहरुका लाइन काट्न थालेपछि सम्वन्धित सबै बाँकी उद्योगीहरुले पनि आफै उद्योगको लाइन काटेर विरोध सुरु गरेका छन् । प्राधिकरणले टीओडी मिटरको डाटाबिना २०७२ माघ देखि २०७५ वैशाखसम्मको प्रिमियम महशुल तिर्न दबाब दिँदै पाँच वटा ठूला उद्योगमा लाइन काटेपछि उद्योगीहरुले पनि प्राधिकरणविरुद्ध रचनात्मक विरोध सुरु गरेका हुन् । पूर्वन्यायाधीश गिरिशचन्द्र लाल नेतृत्वको न्यायिक आयोगको प्रतिवेदन कार्यान्वयनको माग गर्दै आएका उद्योगीहरुले उक्त आयोगको सिफारिस र मन्त्रिपरिषदको निर्णयविपरित प्राधिकरणले जबरजस्ती बिना आधार गैरकानुनीरुपमा रकम अशुल्न खोजेको भन्दै पाँच उद्योगहरुमा लाइन काट्ने निर्णय फिर्ता नभएकाले पूर्वघोषित कार्यक्रमअनुसार आज आइतबारबाट सबै बाँकी ५६ वटा पीडित उद्योगहरुले पनि आफै विद्युत कटौती गरेर विरोध सुरु गरेका हुन् । दैनिक पाँच सय मेगावाटभन्दा धेरै विद्युत खेर गइरहेको बेला ठूला उद्योगीहरुले समेत विजुली प्रयोग नगरिदिँदा प्राधिकरणलाई थप करोडौं रुपियाँ नोक्सान हुने भएको छ ।