काठमाडौं– नेपाल आयल निगमले पेट्रोलियम पदार्थको मूल्यमा उल्लेखनीय कटौती गर्दै उपभोक्तालाई राहत दिएको छ। अन्तर्राष्ट्रिय बजारमा कच्चा तेलको मूल्य घटेपछि निगमको सञ्चालक समितिले पेट्रोल, डिजेल, मट्टितेल, हवाई इन्धन तथा खाना पकाउने एलपी ग्यासको मूल्य घटाउने निर्णय गरेको हो।
नयाँ मूल्य बुधबार राति १२ः०१ बजेदेखि लागू भइसकेको निगमले जनाएको छ।
नयाँ मूल्यअनुसार पेट्रोलको मूल्य प्रतिलिटर २० रुपैयाँले घटाइएको छ। डिजेल र मट्टितेलको मूल्य प्रतिलिटर ३० रुपैयाँले घटाइएको छ भने आन्तरिक हवाई इन्धन प्रतिलिटर ४० रुपैयाँले सस्तो भएको छ। त्यसैगरी, खाना पकाउने एलपी ग्यासको मूल्य प्रतिसिलिन्डर १०० रुपैयाँले घटाइएको छ।
निगमका अनुसार अन्तर्राष्ट्रिय बजारमा इन्धनको खरिद मूल्यमा आएको गिरावटका आधारमा स्वचालित मूल्य प्रणालीअनुसार मूल्य समायोजन गरिएको हो।
पछिल्लो समय इन्धनको मूल्यवृद्धिका कारण बजारमा महँगी बढ्नुका साथै ढुवानी र सार्वजनिक यातायातको लागतसमेत बढेको भन्दै मूल्य घटाउन सर्वसाधारण तथा विभिन्न क्षेत्रबाट माग भइरहेको थियो।
पेट्रोलियम पदार्थको मूल्यमा गरिएको यस कटौतीले सार्वजनिक यातायातको भाडा, ढुवानी खर्च तथा उत्पादन लागतमा कमी आउन सहयोग पुग्ने अपेक्षा गरिएको छ। यसबाट समग्र बजारमा मूल्यवृद्धिको दबाब कम गर्न सकारात्मक योगदान पुग्ने विश्वास गरिएको छ।
