काठमाडौं । सरकारले स्थायी लेखा नम्बर प्यानमा कडाई गरेपछि बीमा समितिले प्यान अनिवार्य गराउन बीमा कम्पनीहरू लाई सर्कुलर जारी गरेको छ । सरकारले आर्थिक वर्ष २०७६/७७ को बजेटमार्फत स्थायी लेखा नम्बर अनिवार्य रुपमा लिनुपर्ने व्यवस्था गरेपछि समितिले यस्तो सर्कुलर जारी गरेको हो ।

समितिले आयकर ऐन २०५८ तथा आयकर नियमावली अनुसार जीवन, निर्जीवन र पुनर्बीमा व्यवसाय गर्ने बीमकको बीमा अभिकर्ता, बीमा सर्भेयर र कर्मचारीहरुलाई प्यान अनिवार्य गराउन परिपत्र जारी गरेको हो । हालसम्म प्यान नलिएका बीमा अभिकर्ता, बीमा सर्भेयर र कर्मचारीहरुलाई सम्बन्धित आन्तरिक राजश्व कार्यालयबाट प्यान लिई बीमकको कार्यालयमा पेश गर्न र निजहरुको नाममा कट्टी भएको रकम सम्बन्धित प्यान उल्लेख गरी दाखिला गराउने व्यवस्था मिलाउन भनिएको छ ।