अष्ट्रेलिया । प्रवासी नेपाली एकता मञ्च अष्ट्रेलियाको बृहत भेला तथा भेटघाट कार्यक्रम सम्पन्न भएको छ । कार्यक्रमका प्रमुख अतिथि नेकपा स्थायी कमिटी सदस्य तथा गण्डकी प्रदेश मुख्यमन्त्री पृथ्वीसुब्बा गुरुङले प्रधानमन्त्री केपी शर्मा ओलीको कदम सहि रहेको भन्दै सबैले साथ दिनुपर्ने बताए । जुम मार्फत भर्चुअल रुपमा गरिएको भेलामा बोल्दै उनले केपी ओलीको सर्मथनमा देशबाट मात्रै नभइ विदेशबाट समेत साथको आवश्यकता रहेको बताउँदै प्रवासी नेपालीहरुलाई सक्रिय रुपमा लाग्न आग्रह गरे ।
प्रवासी नेपाली एकता मञ्च अध्यक्ष रमेश पाण्डेले एकता मञ्च अन्तरगतका विभिन्न समिति, आयोग सदस्य र केन्द्रिय सदस्यहरुलाई शपथ गराएका थिए । भेला मार्फत एनएस डब्लु राज्यका संयोजक कृष्ण सापकोटा र सचिव शिव पौडेल चयन भए भने केन्द्रीय युवा संघको संयोजक अरुण गौतम र सहसंयोजकमा प्रकाश सुवेदी चयन भए । भेलाले प्रवक्ताको जिम्मेवारी सन्तोष दाहाललाई तोकेको छ । यस्तै प्रचार विभागको सचिवमा एनएस डब्लु संयोजक अनिल खड्कालाई जिम्मेवारी तोकेको छ । ११ सदस्यीय सल्लाहकार समितिमा होम पाण्डे डा विनोद श्रेष्ठ लगायत छन् । भेलाले १ सय ३५ सदस्यीय नेकपा पार्टी कमिटी गठन गरेको प्रवक्ता दाहालले बताए ।
नवगठित एनएस डब्लु कमिटिका सचिव शिव पौडेलको संयोजकत्वमा भएको कार्यक्रममा करिब १ सय ५० जनाको उपस्थिती रहेको थियो । भेलाको अध्यक्षयता न्यु साउथ वेल्स र एसिटी राज्यका इन्चार्ज तथा पूर्वउपाध्यक्ष केशव जोशिले गरेका थिए भने स्वागत मन्तव्य केन्दि«य सदस्य अनिल खड्काले गरेका थिए ।