काठमाडौ । फर्जी चेक दिएर हैरान पार्ने व्यक्ति वा संस्थालाई नेपाल राष्ट्र बैंके कडा नियम सार्वजनिक गरेको छ । नेपाल राष्ट्र बैंकले सोमबार एकिकृत निर्देशनलाई संशोधन गर्दै चेक काटिएको एक हप्तासम्म भुक्तानी नभए खातावालालाई कालोसूचीमा राख्ने व्यवस्था मिलाएको छ । खातामा रकम अपुग भएवा हस्ताक्षर नमिलेमा बैंकले एक साताको समय दिएर रकम भुक्तानी गर्न खातावालाई जानकारी दिनु पर्ने पनि निर्देशन जारी गरेको छ ।
खातामा रकम अपुग भएमा १ एकपटक भुक्तानी नभइकन फिर्ता भएको चेक कम्तीमा दुई दिनको समय दिई सम्बन्धित बैंक वा वित्तीय संस्थामा पुनः चेक पेश गर्न सक्नेछ । चेकमा गलत हस्ताक्षर गरी चेक भुक्तानी नभएमा बैंकले सो चेक धारकलाई चेकको हस्ताक्षर नमिलेको व्यहोरा लिखित रुपमा जानकारी गराउनु पर्ने छ । राष्ट्र बैंकको निर्देशन बमोजिम कालो सूचीमा समावेश भएका व्यक्ति, फर्म, कम्पनी, संस्थाले बैंक तथा वित्तीय संस्थामा खाता खोल्न नपाउने व्यवस्था मिलाइएको छ । साथै कालो सूचीमा रहेको व्यक्ति, फर्म, कम्पनी वा संस्थाको कायम रहेको खातामा रकम जम्मा गर्न बाहेक अन्य बैकिङ्ग कारोबार गर्न नपाइने राष्ट्र बैंकले जनाएको छ ।