एजेन्सी । कोरोना विरुद्धको खोप अभियान पूर्ण रुपमा सफल भइसकेको छैन । ९५ प्रतिशत भन्दा बढी प्रभावकारी मानिएका भ्याक्सिनको पनि साइड इफेक्ट देखिन थालेको छ । फाइजरको कोरोना खोप लगाएकी पोर्चुगलकी एक स्वास्थ्यकर्मीको मृत्यु भएको छ ।

फाइजरको खोप लगाएको ४८ घण्टापछि स्वास्थ्यकर्मीको अचानक मृत्यु भएको अन्तराष्ट्रिय सञ्चारमाध्यमहरुले जनाएका छन् । पोर्टोस्थित अङ्कोलोजी इन्सिट्च्यूटमा बाल विभागमा कार्यरत ४१ वर्षकी नर्स सोनीया एक्कीभेदोको मृत्यु भएको हो । सोनीयाका बाबु एबीलो एक्कीभेदोले आफ्नी छोरीको स्वास्थ्यमा कुनै समस्या नरहेको बताउनुभएको छ ।

‘सोनीयालाई कोरोनाको खोप दिइएको थियो तर उनीमा कोरोनाको कुनैपनि लक्षण थिएन, मलाई थाहा छैन के भयो तर मलाई छोरीको मृत्युको जवाफ चाहिन्छ,’एबीलोले भन्नुभयो । सोनीया कार्यरत अङ्कोलोजी इन्सिट्च्यूटले नयाँ वर्षको दिन एक्कासी उनको निधन भएको र सोनीयाको निधनले अपूरक्षणीय क्षति पुगेको बताएको छ ।