सीआईबीले विभिन्न बीमा तथा वित्तीय संस्थासँग आबद्ध ५६ जना उच्चपदस्थ व्यक्तिको सेयर रोक्का गर्न नेपाल धितोपत्र बोर्डलाई पत्राचार गरेको छ । धितोपत्र सम्बन्धी ऐन, २०६३ अन्तर्गतको कसूरमा अनुसन्धान अघि बढाउँदै नेपाल प्रहरीको केन्द्रीय अनुसन्धान ब्यूरो (सीआईबी)ले उनीहरूको धितोपत्र लगानी रोक्का राख्न र आवश्यक विवरण उपलब्ध गराउन आग्रह गरेको हो ।
सीआईबीले २०८३ जेठ ११ गते धितोपत्र बोर्डलाई पत्र पठाउँदै बोर्डकै जाहेरीका आधारमा दर्ता भएको मुद्दामा अनुसन्धानका लागि उक्त कदम चालिएको जनाएको छ । वादी नेपाल सरकार र प्रतिवादी दीपक भट्टसमेत रहेको मुद्दाको अनुसन्धानका क्रममा बीमा तथा वित्तीय क्षेत्रका चर्चित व्यवसायी, सञ्चालक र प्रमुख कार्यकारी अधिकृतहरूको सेयर कारोबारमाथि निगरानी बढाइएको हो ।
ब्यूरोले धितोपत्र बोर्डको अनुसन्धान तथा कारबाही शाखालाई सम्बोधन गर्दै विभिन्न कम्पनीका सञ्चालक, लगानी समिति सदस्य तथा प्रमुख कार्यकारी अधिकृतहरूको सेयर रोक्का गर्न निर्देशन दिएको जनाएको छ ।
हिमालयन री–इन्स्योरेन्स लिमिटेडका प्रमुख कार्यकारी अधिकृत उपासना पौडेलसहित सञ्चालकहरू अमित मोर, राजीव मोर, शुभेच्छा खरेल, सुभाषकुमार झुनझुनवाला तथा लगानी समिति सदस्य मनिष कुमारको सेयर रोक्का गर्न भनिएको छ ।
नेपाल माइक्रो इन्स्योरेन्स लिमिटेडका सञ्चालक सिद्धान्त झुनझुनवाला, लतिका गोल्याण, बद्री सिग्देल, प्रविना दाहाल तथा सुजल मल्ल पनि अनुसन्धानको दायरामा परेका छन् ।
त्यसैगरी गार्डियन माइक्रो लाइफ इन्स्योरेन्सका सञ्चालक डा. जयप्रकाश जैसवाल, उदयनारायण भट्टराई, प्रमोदप्रसाद भट्टराई, ज्योती अग्रवाल, नवराज मुडभरी, प्रमुख कार्यकारी अधिकृत चिरायु भण्डारी तथा लगानी समिति सदस्यहरू ज्योतीप्रकाश पाण्डे र समीर खरेलको नाम पनि सूचीमा समावेश गरिएको छ ।
हिमालयन लाइफ इन्स्योरेन्सका सञ्चालक तथा लगानी समितिसँग आबद्ध विवेककुमार शाह, लक्ष्मण ज्ञावली, राजीवप्रसाद प्याकुरेल, आशिष ढकाल, सौरभ दुगड, सचिन आचार्य, प्रमिला केसी र दिगम्बर झा पनि सीआईबीको अनुसन्धानमा परेका छन् ।
यसैगरी हिमालय सेक्युरिटी बैंकरका सित्ताराम वाग्ले र आकांक्षा गुप्ता, हिमालयन क्यापसर्भका अध्यक्ष शिशिर गैह्रे तथा हिमालयन इन्भेष्टमेन्ट बैंकरका अध्यक्ष कपिलकुमार दाहालसहित अन्य पदाधिकारीहरूको सेयर पनि रोक्का गर्न भनिएको छ ।
सूचीमा क्रेष्ट माइक्रो इन्स्योरेन्सका विदुर पुरी तथा प्रोटेक्टिभ माइक्रो इन्स्योरेन्सकी कीर्तिका अग्रवाल र दिनेश सरियाको नामसमेत समावेश गरिएको छ ।
