काठमाडौं । विमा कम्पनीहरुको संख्या वृद्धि भए पनि बजार विस्तार हुन सकिरहेको छैन । शहर केन्द्र्रीत बीमा कम्पनीहरु गाउँ गाउँमा पनि जान थालेका छन् । तर चेतनाको अभावले ठाउँ पुगेका बीमा कम्पनी त्यहाँ टिक्न सक्ने अवस्थाको विकास अझै भइसकेको छैन ।
आम नागरिकलाई बीमा चेतना फैलाउन नसक्दा यो अवस्था आएको हो । यही बेला बीमा जागरण र सचेतना फैलाउने उद्देश्यले इन्स्योरेन्स प्रोफेशनल सोसाईटी गठन भएको छ । बीमा समितिका कानुन निर्देशक दिनेशलाल कर्णको प्रमुख आतिथ्यमा जनकपुरमा आयोजित भेलाले आईएमई जनरल इन्स्योरेन्सका अर्जुनकुमार पौडेलको अध्यक्षतामा सोसाइटी गठन गरेको हो । बीमा समितिका सुशिलदेव सुवेदी विशेष अतिथि तथा मेघेन्द्र प्रकाश गिरी र सोन आलेमगरको अतिथि रहेको भेलाले ११ सदस्यीय कार्य समिति चयन गरेको छ ।
सो संस्थाले बीमा समितिकै मातहतमा रहेर बीमा जनचेतनाको काम गर्ने उद्देश्य लिएको छ । सोसाइटीको उपाध्यक्षमा नेपाल लाईफका अनिल मिश्र, महासचिवमा एशियन लाईफका पुरुषोत्तम कुर्मी तथा कोषाध्यक्ष सिटिजन्स लाइफका आकाश पाण्डे छानिएका छन् । नव निर्वाचित अध्यक्ष पौडेलले बीमाबारे जनचेतना जगाउन सोसाइटीले सक्रिय भएर काम गर्ने प्रतिबद्धता व्यक्त गरेका थिए ।
बीमा समिति र सोसाईटीबीच अन्तरक्रिया
यसैबीच, बीमा समितिको उच्च स्तरीय टोलीसँग इन्स्योरेन्स प्रोफेशनल सोसाईटीले अन्तरक्रिया कार्यक्रम सम्पन्न भएको छ । कार्यक्रममा बीमालाई आम जनताको जीवन र दैनिकीसँग जोड्ने बारे छलफल भएको थियो ।
स्थानीय तहसँग बीमा समितिअन्तर्गत जनकपुरधाम उपमहानगरपालिकासँग अन्तरक्रिया गर्न जनकपुर पुगेको बीमा समितिका अध्यक्ष चिरञ्जीवी चापागाँई सहितको टोली र इन्स्योरेन्स प्रोफेशन सोसाईटीका पदाधिकारीबीच अन्तरक्रिया कार्यक्रम आयोजना गरिएको हो ।
