कैलाली । प्रदेश नम्बर ७ प्रदेश कार्यालयअन्तर्गत कार्यरत कर्मचारीका लागि महालक्ष्मी लाइफ इन्स्योरेन्सले सम्पत्ति शुद्धीकरण सम्बन्धी तालिम कार्यक्रमको आयोजना गरेको छ । धनगढीमा आयोजित कार्यक्रममा इन्स्योरेन्सले फागुण १७ गते प्रदेश ७ अन्तर्गतका ७ वटा शाखा उपशाखामा कार्यरत २० जनाभन्दा बढी कर्मचारीलाई उक्त तालिम दिएको हो ।
तालिममा गैरकानुनी कमाई र आतंककारी कार्यबाट संकलित कालो धनलाई बीमा क्षेत्रको माध्यामबाट सेतो धन कसरी बनाइन्छ, शुद्धीकरण गर्ने क्षेत्रहरु कुन–कुन हुन्, नियन्त्रणका प्रक्रियाहरु के–के हुन्, रिपोर्टिङ कसरी गर्ने, दण्ड जरिवाना कति छ आदि विषयमा विस्तृत जानकारी दिइएको थियो । कम्पनीका सहायक महाप्रबन्धक तथा मानव संसाधन विभाग प्रमुख सपना खरेलले दिएको उक्त तालिममा नायव प्रमुख कार्यकारी अधिकृत कमल पन्थी, एजेन्सी विभाग प्रमुख सिताराम धिमाल र क्षेत्रीय प्रमुख हर्कबहादुर बोहोराको उपस्थिति रहेको थियो ।