काठमाडौं । सधैं आश्वासनमा पार्दै आफ्नो गर्जो टार्दै आएको नेकपा अध्यक्ष तथा प्रधानन्त्री केपी शर्मा ओलीको समूहले यस पटक पनि वामदेवलाई मनाउन हरसम्भव प्रयास गरेको छ । पार्टीको विवाद विभाजनकै अवस्थामा पुगेका बेला उपाध्यक्ष गौतमलाई रातभर फकाई फुल्याई गरेर अध्यक्षसम्मको प्रस्ताव गरिएको छ । नेकपा विभाजनसम्मको आशंका भइरहेका वेला प्रधानमन्त्री केपी ओलीनिकट नेताहरूले मध्यराति करिब सात घन्टा उपाध्यक्ष वामदेव गौतमसँग उनकै निवास भैँसेपाटीमा छलफल गरे पनि यस पटक वामदेव टसकोमस भएका छैनन् । खानपिनको व्यवस्थापसछ भएको वार्तामा उपप्रधानमन्त्री तथा रक्षामन्त्री ईश्वर पोखरेल, संसदीय दलका उपनेता सुवास नेम्वाङ, महासचिव विष्णु पौडेल र प्रदेश ५ का मुख्यमन्त्री शंकर पोखरेल सहभागी थिए । महासचिव विष्णु पौडेलले उपाध्यक्ष गौतमलाई शीतलनिवास लगेर राष्ट्रपतिसँग समेत संवाद गराएका थिए । गौतमले आफ्नो निवासमा भएको छलफलबारे प्रचण्ड, वरिष्ठ नेता झलनाथ खनाल, मावधकुमार नेपाल, नारायणकाजी श्रेष्ठ र रामबहादुर थापालाई भने, मलाई भावी अध्यक्ष बन्ने अफर आयो । बहुदलीय जनवादको नेतृत्व गर्ने भनियो । तर, मैले धेरैपटक धोका पाएँ, अब त्यस्तो गल्ती गर्दिनँ भनेर पठाएँ ।