काठमाडौं । बैंक तथा वित्तीय संस्थालाई सामाजिक सुरक्षा कोषमा दर्ता हुन नेपाल राष्ट्र बैंकले निर्देशन दिएकोमा आपत्ति जनाएको छ । नेपाल वित्तीय संस्था कर्मचारी संघले राष्ट्र बैंकका गभर्नरलाई ध्यानाकर्षण पत्र लेख्दै बैंक तथा वित्तीय संस्थालाई जारी गरिएको निर्देशन तत्काल फिर्ता लिन समेत आग्रह गरेको छ । कर्मचारी संघले सरोकारवालासँग छलफल नै नगरी एकपक्षीय रुपमा नियामक निकायको कार्यक्षेत्र र अधिकारको दुरुपयोग गरी सामाजिक सुरक्षा कोषमा बैंक तथा वित्तीय संस्थालाई निर्देशन दिएको ठहर कर्मचारी संघको छ ।
सरकारले तोकेको सामाजिक सुरक्षा योजनामा समावेश हुँदा बैंक तथा वित्तीय क्षेत्रमा कार्यरत कर्मचारीहरुले पाइरहेको सेवा सुविधाहरुको ग्यारेन्टी गरेर मात्रै सामाजिक सुरक्षा कार्यक्रममा सहभागी हुने व्यवस्था गर्न समेत संघले माग गरेको छ ।
बैंक तथा वित्तीय संस्थाहरुमा कर्मचारीहरुले सामाजिक सुरक्षा कोषमा जम्मा गर्दा, अवकाश पछि भुक्तानी लिँदा तिनुपर्ने दोहोरो कर व्यवस्थालाई संशोधन गनुपर्ने, सेवाबाट अवकाश लिँदा पाउने उपदान बापतको रकम पूर्ववत रुपमा ५ वर्ष पुगेपछि सहजै पाउने व्यवस्था हुनु पर्ने र एकमुष्ठ पेन्सन सुविधा पाउने व्यवस्था यथावत कायम हुनुपर्ने संघको माग छ ।
सामाजिक सुरक्षा कोषमा देखिएका ब्यवहारिक र कानुनी जटिलतालाई सहज र अनुकुल बनाएर मात्र लागू गर्न संघले माग गरेको छ। राष्ट्र बैंकले दिएको निर्देशनले बैंक तथा वित्तीय संस्थाका कर्मचारीहरुले उपभोग गरिरहेको सुविधा कटौती हुनसक्ने आशंका समेत व्यक्त गरेको छ ।