काठमाडौं । नेपालको अर्थतन्त्र धान्ने रेमिट्यान्सलाई व्यवस्थित गर्न बेला बेलामा नयाँ नयाँ नियम कानुन आउन गरेका छन् । विदेशमा रहेका नेपालीहरुले आर्जन गरेको रकम नेपाल पठाउँदा अब बैंक तथा रेमिट्यान्स कम्पनीहरुले एक लाखभन्दा बढी भूक्तानी नगदमा गर्न नपाउने व्यवस्था गरिएको छ ।
यसैगरी आन्तरिक विप्रेषको कारोबार कम्पनीले अनिवार्य रुपमा विप्रेष सिस्टम प्रयोग गर्नुपर्ने र प्रति व्यक्ति एक दिनमा एक लाखभन्दा बढी कारोबार गर्न नपाइने व्यवस्था समेत गरिएको छ । यो व्यवस्थासँगै अब रेमिट्यान्स कारोबार गर्ने बैंक तथा वित्तिय संस्थान तथा एजेन्टहरुले एक लाखमाथिको कारोबारमा अनिवार्य बैंक खाता वा चेक प्रयोग गर्नु पर्ने भएको छ ।
राष्ट्र बैंकद्वारा जारी भुक्तानी प्रणाली सम्बन्धी एकीकृत निर्देशन २०७६ अनुसार विद्युतिय माध्यमद्वारा वैदेशिक रेमिट्यान्सको भुक्तानी गर्दा एक लाख माथिको रकम नगदमा भुक्तानी नगर्न व्यवस्था गरेको हो । त्यस्तै, विदेशमा रहेका नेपालीहरुबाट जम्मा भएको रकम सम्बन्धीत पक्षलाई भुक्तानी गर्दा ग्राहक पहिचन नम्बर, नाम, ठेगाना, रकम र सम्पर्क नंबर यकिन गरेर मात्र भुक्तानी गर्न निर्देश गरेको छ ।
