काठमाडौं । कोरोना भाइरसको संक्रमण भित्रिन र फैलिन नदिनका लागि स्थानीय प्रशासन सजग हुन थालेका छन् । चितवन जिल्ला प्रशासन कार्यालयले स्थानीय स्तरमा कुनै पनि सभा, सम्मेलन, महोत्सव, भेलालगायत भीडभाड हुने कुनै पनि कार्यक्रम नगर्न सार्वजनिक सूचना जारी गरेलगत्तै प्रदेश नं. ५ सरकारले पनि मन्त्रिपरिषद्बाटै निर्णय गरी अर्को निर्णय नभएसम्मका लागि यस्ता किसिमका कार्यक्रम प्रदेशस्तरमा नगर्न अनुरोध गरेको छ । त्यसैगरी संघीय राजधानी रहेको काठमाडौं जिल्ला प्रशासन कार्यालयले पनि बिहीबार सार्वजनिक सूचनाजारी गर्दै भीडभाडयुक्त कुनै पनि कार्यक्रम नगर्न आग्रह गरेको छ । यसैगरी कपिलवस्तु जिल्ला प्रशासन कार्यालयले पनि सोही प्रकृतिको आदेश जारी गर्दै सर्वसाधारणलाई सचेत रहन आग्रह गरेको छ ।