काठमाडौं । संघीय मामिला तथा स्थानीय विकास मन्त्रालयले केही सहसचिवको सरुवा गरेको छ । शुक्रबार दिउँसो निर्णय गरी सहसचिवहरुको काज सरुवासम्बन्धी पत्र सम्बन्धित मन्त्रालय वा निकायमा पठाइसकिएको मन्त्रालय स्रोतले बताएको छ । स्रोतकाअनुसार, सरुवा हुनेमा मधेशी आयोगका सचिव एवं सहसचिव पुष्प शाहीलाई युवा तथा खेलकुद मन्त्रालयमा काज सरुवा गरिएको छ भने भरतपुर महानगरपालिकाका कार्यकारी अधिकृत एवं सहसचिव नेत्र सुवेदी (प्रयास) लाई उद्योग बाणिज्य तथा आपूर्ति मन्त्रालयमा सरुवा गरिएको बताइएको छ । त्यसैगरी मुख्यमन्त्री तथा मन्त्रिपरिषद् कार्यालय प्रदेश नं. २ का सचिव एवं सहसचिव सुशील ढकाललाई दलित आयोगमा काज सरुवा गरिएको छ । सहसचिव सुवेदी नेकपा अध्यक्ष पुष्पकमल दाहालको जोडबलमा बाणिज्य तथा आपूर्ति मन्त्रालय पुगेको बताइन्छ । कात्तिक १४ गते बाणिज्य विभागका महानिर्देशक योगेन्द्रकुमार गौचनले अनिवार्य अवकाश पाएपछि उक्त विभाग महानिर्देशक बिहीन अवस्थामा छ । सुवेदीलाई सोही स्थानमा लैजानका लागि बाणिज्य तथा आपूर्ति मन्त्रालय काज सरुवा गरेको बताइन्छ । ढकाल केही समयअघि मात्रै प्रदेश नं. २ मा सरुवा भएका थिए । त्यसअघि प्रधानमन्त्री तथा मन्त्रिपरिषद् कार्यालयमा कार्यरत रहेका उनी केही समयपछि सचिव हुने लाइनमा छन् ।

सञ्चार मन्त्रालय सचिव विहीन
सञ्चार तथा सूचना प्रविधि मन्त्रालय अहिले सचिव विहीन अवस्थामा पुगेको छ । मन्त्रालयका सचिव महेन्द्रमान गुरुङले कात्तिक २० गते सेवा अवधिका कारण अवकाश पाएपछि मन्त्रालय सचिविहीन भएको हो । मन्त्रालय सचिवविहीन भएपछि सहसचिव विरेन्द्रकुमार मिश्राले अहिले निमित्त सचिवको रुपमा कार्यभार सम्हालेका छन् । मिश्र पनि कात्तिक २३ गते शनिबार करिब १० दिने विदेश भ्रमणमा जाने भएपछि निमित्तका भरमा सञ्चालन भइरहेको मन्त्रालय झन् निमित्त सञ्चालन हुने भएको छ । मन्त्रालयको रिक्त सचिव पदमा जानका लागि केही सचिवहरुको दौडधूप चलिरहेको बताइन्छ । उक्त स्थानमा जान प्रदेशमा रहेका प्रमुख सचिवहरुले पनि आशा गरिरहेका छन् । त्यसमा पनि लामो समय प्रदेश नं. २ मा प्रमुख सचिव पदमा कार्यरत दीपक सुवेदी, प्रदेश नं. १ का सुरेश अधिकारीले विशेष रुचि राखेको बतान्छ । सञ्चारमन्त्री गोकुल बास्कोटाले पनि यस सम्बन्धमा ठोस निर्णय नलिएको र आगामी मन्त्रिपरिषद्बाट सञ्चार सचिव बनाउने तयारी भइरहेको बुझिएको छ ।