काठमाडौं । सिटिजन्स बैंक इन्टरनेसनलको १३औं वार्षिक साधारण सभाले वितरण योग्य मुनाफाबाट १२ प्रतिशत नगद लाभांश र ३ प्रतिशतल बोनस शेयर दिने प्रस्ताव पारित गरेको छ । संचालक समितिका अध्यक्ष डा.शंकर प्रसाद शर्माको अध्यक्षतामा सम्पन्न सभाले आव. २०७५/७६ को संचालक समितिको वार्षिक प्रतिवेदन छलफल गरि पारित पनि गरेको छ ।
बैंकको लेखापरीक्षकको प्रतिवेदनसहित २०७६ आषाढ मसान्तको वासलात, आ.व. २०७५/७६ को नाफा नोक्सानीको हिसाव तथा नगद प्रवाह विवरण लगायतका एकीकृत वित्तीय विवरणहरु छलफल गरी स्वीकृत भएको छ । त्यसै गरी साधारण सभाले गत आर्थिक वर्ष २०७५र७६ को वितरण योग्य मुनाफाबाट १२ प्रतिशतले हुने रकम रु. १ अर्ब ४५ लाख २७ हजार ७ सय ७३ नगद लाभांश र ३ प्रतिशतले हुने रकम रु। २५ करोड ११ लाख ३१ हजार ९ सय ४३ बरावरको बोनस शेयर दिने प्रस्ताव सर्वसम्मतिबाट पारित गरेको छ ।
डाइरेक्टरमा युवा उद्यमी पाण्डे
सिटिजन्स बैंक इन्टरनेसनलको बोर्ड अफ डाइरेक्टरमा युवा उद्यमी प्रवलजङ्ग पाण्डे चुनिएका छन् । उनी केही वर्ष अघि इन्टरनेसनल लिजिङ एन्ड फाइनान्स कम्पनी (आईएलएफसी) मा पनि डाइरेक्टर भइकेका छन् भने बैंकमा पहिलो पटक बैंकको डाइरेक्टरमा चुनिएका हुन् । सिमेन्ट, औषधिलगायतका क्षेत्रमा पाण्डेको लगानी ठूलो छ भने विभिन्न बैंक, बिमा कम्पनीमा पनि उनको लगानी रहेको बताइन्छ ।
पाण्डे कसमस सिमेन्टमा डाइरेक्टर भने इस्टन कसमसमा पनि डाइरेक्टरकै भूमिकामा छन् । लोमस फर्मास्यूटिकल्समा पनि उनको भूमिका डाइरक्टरकै छ । त्यसैगरी निजी क्षेत्रबाट सञ्चालित डाटा हबमा पनि पाण्डे आवद्ध छन् ।
