काठमाडौं — सिद्धार्थ प्रिमियर इन्स्योरेन्स ले चालु आर्थिक वर्ष २०८२/८३ को तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ।
विवरणअनुसार कम्पनीले चालु आर्थिक वर्षको पहिलो ९ महिनामा ४ करोड १ लाख रुपैयाँ खुद नाफा आर्जन गरेको छ। अघिल्लो आर्थिक वर्षको सोही अवधिमा कम्पनीको नाफा ४५ करोड ३६ लाख रुपैयाँ रहेको थियो। यस आधारमा कम्पनीको नाफा ९१.१५ प्रतिशतले घटेको देखिन्छ।
चैत मसान्तसम्म कम्पनीको विशेष जगेडामा २ अर्ब ५० करोड रुपैयाँ, महाविपत्ति कोषमा २३ करोड १८ लाख रुपैयाँ, रिटेन्ड अर्निङमा ३३ करोड २७ लाख रुपैयाँ तथा अन्य इक्विटीमा १ अर्ब १४ करोड ६२ लाख रुपैयाँ रहेको छ। अघिल्लो आर्थिक वर्षको असार मसान्तसम्म रिटेन्ड अर्निङ ९९ करोड ८७ लाख रुपैयाँ रहेको थियो, जुन अहिले घटेको देखिएको छ।
यद्यपि कम्पनीको बीमा कोषमा उल्लेख्य वृद्धि भएको छ। समीक्षा अवधिसम्म बीमा कोष ११ अर्ब १५ करोड ९९ लाख रुपैयाँ पुगेको छ, जबकि अघिल्लो वर्ष असार मसान्तसम्म यो ५ अर्ब ६३ करोड ७३ लाख रुपैयाँ थियो। यसले बीमा कोषमा करिब ९७.९७ प्रतिशत वृद्धि भएको संकेत गर्छ।
कम्पनीले तेस्रो त्रैमाससम्म २ अर्ब ६९ करोड ९८ लाख रुपैयाँ कुल बीमाशुल्क आर्जन गरेको छ। अघिल्लो वर्षको सोही अवधिमा कुल बीमाशुल्क २ अर्ब ६७ करोड ५४ लाख रुपैयाँ थियो। यस आधारमा कुल बीमाशुल्क आर्जन ०.९१ प्रतिशतले बढेको छ।
यस्तै, समीक्षा अवधिमा कम्पनीको खुद बीमाशुल्क आर्जन १ अर्ब ३० करोड ६ लाख रुपैयाँ रहेको छ। अघिल्लो वर्ष यही अवधिमा यस्तो आर्जन १ अर्ब ३७ करोड ४ लाख रुपैयाँ थियो। यसले खुद बीमाशुल्क ५.०९ प्रतिशतले घटेको देखाउँछ।
२ अर्ब ८० करोड ६५ लाख रुपैयाँ चुक्तापुँजी रहेको कम्पनीको वार्षिकीकृत प्रतिशेयर आम्दानी (EPS) घटेर १.९१ रुपैयाँमा सीमित भएको छ। अघिल्लो वर्ष यही अवधिमा EPS २१.५५ रुपैयाँ रहेको थियो। कम्पनीको प्रतिशेयर नेटवर्थ भने २५०.०६ रुपैयाँ कायम रहेको छ।
