काठमाडौँ । बैकिङ क्षेत्रमा २५ वर्षको अनुभव संगालेका ज्ञानेन्द्रप्रसाद ढुङ्गानाले  नबिल बैंकका नवनियुक्त प्रमुख कार्यकारी अधिकृतको कार्यभार सम्हालेका छन् । बैंककोे असार १६ गते सम्पन्न संचालक समितिको बैठकले सीईओमा ढुङ्गानालाई नियुक्त गर्ने निर्णय थियो । बैंकिङ क्षेत्रको व्यवस्थापन तह तथा नेतृत्वदायी भूमिकामा रही २५ वर्ष भन्दा बढी अनुभव संगालेका ढुङ्गानाले यसअघि नेपाल बंगलादेश बैंकको प्रमुख कार्यकारी अधिकृतका रूपमा १० वर्षसम्म नेतृत्व गरेका थिए । यसबाहेक उनले नेपाल क्रेडिट एण्ड कमर्स बैंकको महाप्रबन्धक तथा नेपाल राष्ट्र बैंकको निर्देशक पदमा समेत रही कार्य गरेका थिए ।
भारतबाट चार्टर्ड एकाउन्टेन्सी र अस्ट्रेलियाबाट सर्टिफिकेट पब्लिक एकाउन्टेन्ट तथा वित्तीय विश्लेषणमा स्नातकोत्तरको अध्ययन पूरा गरेका ढुङ्गाना सन् २०१३ मा नेपाल व्यवस्थापन संघद्वारा म्यानेजर टु वाच र सन् २०१५ मा म्यानेजर अफ द इयरविधामा पुरस्कृत भएका थिए । ढुङ्गाना सन् २०१८ मा नेपाल बैंकर्स एसोसिएसनको अध्यक्षमा चयन भएका थिए । उनको कुशल र सक्षम नेतृत्वमा आगामी दिनमा समेत नबिल बैंकले विभिन्न वित्तीय सूचकाङ्कहरूमा अग्रणी स्थान हासिल गर्दै थप उचाइ प्राप्त गर्ने आशा गरिएको छ । उनले नबिल बैंकमा एनबी बैंकलाई मर्जर गराउन उल्लेख्य भूमिका निर्वाह गरेका थिए । नबिल र एनबीबीचको मर्जरलाई नेपाल राष्ट्र बैंकले अन्तिम स्वीकृति समेत प्रदान गरिसकेको छ । दुई बैंकबीचको एकीकृत कारोबार छिट्टै गर्ने तयारी समेत भइरहेको बैंकले जनाएको छ ।