काठमाडौँ । तुलसीप्रसाद गौतम हिमालयन बैंकको अध्यक्षमा चयन भएका छन् । बैंकको बुधबार सम्पन्न साधारणसभाबाट गौतम अध्यक्षमा चयन भएका हुन् । कर्मचारी सञ्चय कोषका प्रशासक रही कार्य गरेका गौतम आएसँगै विगत १६ वर्षदेखि लगातार अध्यक्ष बनेका मनोजबहादुर श्रेष्ठ नेतृत्वबाट बाहिरिएका छन् ।
बैंकको संचालक समितिमा गौतमसहित प्रचण्डबहादुर श्रेष्ठ, फैजल एन ललानी, सुनिलबहादुर थापा र आशिष शर्मा निर्बिरोध निर्वाचित भएका छन् । सुनील थापा पूर्वप्रधानमन्त्री सूर्यबहादुर थापाका छोरा हुन् । ती मध्यबाट गौतम अध्यक्षमा निर्वाचित भएका हुन् ।
यसैबीच साधारण सभाले शेयरधनीहरुलाई १० प्रतिशत बोनस शेयर र १२ प्रतिशत नगद लाभांश (कर सहित) वितरण गर्ने प्रस्ताव पारित गरेको छ । यो बोनस शेयरको वितरण पश्चात बैंकको चुक्ता पूँजी रु. ९ अर्ब ३७ करोड २२ लाख ८१ हजार ४ सय २८ पुग्ने बैंकले जनाएको छ ।