काठमाडौ । हिमालयन बैंकले २७औं वार्षिक साधारणसभाको आह्वान गरेको छ । नेपाल राष्ट्र बैंकले गत आर्थिक वर्ष २०७५/७६ को वार्षिक प्रतिवेदनलाई स्वीकृत गर्दै बैंकभित्रको लामो विवाद हटाएर ३० दिनभित्र सञ्चालक समिति सदस्य निर्वाचनबाट चयन गर्ने भएको छ । नेपाल राष्ट्र बैंकको सोही निर्देशन बमोजिम बैंकले वार्षिक साधारणसभाको आह्वान गरिसकेको छ । लाभांश अनुमोदन र ५ सञ्चालकहरूको निर्वाचन गर्ने एजेण्डा सहित साधारण सभा आह्वान गरेको हो । बैंकले माघ २९ गते त्रिभुवन आर्मी अफिसर्स क्लब, भद्रकालीमा २७ औँ वार्षिक साधारण सभा आह्वान गरेको हो । सो साधारणसभामा बैंकको सञ्चालक समितिले प्रस्ताव गरेबमोजिम हाल कायम चुक्ता पूँजीको १० प्रतिशत बोनस शेयर र सोको कर प्रयोजनार्थ सहित १२ प्रतिशत नगद लाभांश वितरण गर्ने विशेष प्रस्ताव पारित गर्नेछ । यसका साथै, संस्थापक शेयरधनीहरूको तर्फबाट ५ जना सञ्चालकहरूको निर्वाचन गर्ने, बैंकको अधिकृत पूँजी वृद्धिगरी १२ अर्ब गर्ने बताइएको छ । यसैगरी स्वतन्त्र सञ्चालक नियुक्ति सम्बन्धी जानकारी गराउने र प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने विशेष प्रस्ताव पनि पारित गर्नेछ ।