लमजुङ । ६ दिन अस्पताल बसेर फर्किएकी एक १३ वर्षीया सुत्केरी बालिकाले गाउँ प्रवेश गर्न पाएकी छैनन् । जबर्जस्ती करणीमा परेर आमा बनेकी ती किशोरीलाई गाउँलेले गाउँ छिर्नै नदिएपछि यस्तो अवस्था आएको हो । बेसीसहर नगरपालिकाकी ती बालिकाले चितवनको भरतपुर अस्पतालमा शल्यक्रियामार्फत छोरी जन्माएकी हुन् । सानो उमेरका कारण लमजुङ जिल्ला सामुदायिक अस्पतालबाट उनलाई भरतपुर पठाइएको थियो । ६ दिन अस्पताल बसेर फर्केकी उनलाई परिवार र गाउँलेले इज्जत नरहने भन्दै नआउन दबाब दिएपछि बेंसीसहरमा डेरा लिएर बस्न बाध्य भएकी छन् । यसै वर्ष मात्र कक्षा ८ उत्तीर्ण गरेकी बालिकाले छोरी जन्माएकी हुन् । बालिकाकी आमाका अनुसार छोरीको पेट ठूलो हुँदै गएपछि वैशाख दोस्रो साता लमजुङ सामुदायिक अस्पतालमा परीक्षणका लागि आउँदा गर्भ रहेको थाहा भएको हो । त्यतिबेला असार ४ मा सुत्केरी हुने मिति तोकिए पनि २÷४ दिन अगाडि अस्पताल आउन भनिएको थियो । अहिले बच्चा र आमा दुवैको स्वास्थ्य राम्रै भए पनि चिकित्सकलाई थप परीक्षण गराउन भने बाँकी रहेको उनीहरुले बताएका छन् । बेसीसहर नगरपालिका, ग्रामीण सामुदायिक विकास केन्द्र (आरसीडीसी) र मानवअधिकारवादी संस्था ‘इन्सेक’ का लमजुङका प्रतिनिधि दलबहादुर मजाकोटीको सहयोगमा बालिका, उनकी छोरी र आमा तीनै जना अहिले बेसीसहरमा डेरा गरी राखिएको छ ।
१३ वर्षको उमेरमा आमा बनेकी ती बालिकाले गाउँकै एक आफन्त नाता पर्ने युवकविरुद्ध प्रहरीमा उजुरी परेको छ । जबर्जस्ती करणी ऐनअन्तर्गत उजुरी दिएपछि प्रहरीले आरोप लगाइएका युवकलाई कारबाहीको दायरामा ल्याउने तयारी गरेको प्रहरीले बताएको छ ।