काठमाण्डौ । कुमारी बैंक लिमीटेडको १९ करोड ऋण प्रकरणमा सो बैंकका प्रमुख कार्यकारी अधिकृत (सीइओ) र नायव प्रमुख कार्यकारी अधिकृत (डेपुटी सीइओ) निर्दोष सावित भएका छन् ।
नेपाल प्रहरीको सेन्ट्रल इन्भेष्टिगेसन ब्यूरो (सीआइबी) ले लामो समयको अनुसन्धानपछि बैंकका सीइओ अनुजमणि तिम्सिना र डेपुटी सीइओ मनिष तिम्सिनाको १९ करोड ऋण प्रकरणमा कुनै संलग्नता नरहेको निश्कर्ष निकालेको हो । योसँगै सरकारी वकिल कार्यालयले समेत सो प्रकरणमा बैंकिङ कसूरको मुद्धा नचल्ने निर्णय गरेको छ ।
सीइओ र डेपुटी सीइओको संलग्नता नरहेको निश्कर्ष निकाल्दै सीआइबीले सो प्रकरणको अनुसन्धान हालै सकाई त्यसको मिसिल सरकारी कार्यालयमा पेश गरेको थियो । सरकारी वकिल कार्यालयले मिसिल तथा अन्य कागजातका आधारमा बैंकिङ कसूरको मुद्धा नचल्ने निर्णय गरेको हो । सो प्रकरणमा लामो समयदेखि सरकारी कागजात किर्ते गरी गैरकानूनी धन्दा गर्दै आएको गिरोहको संलग्नता रहेको उल्लेख गर्दै यो प्रकरणमा बैंकिङ कसूर गरेको नदेखिएको समेत निश्कर्ष निकालिएको छ ।
नेपाल प्रहरीको केन्द्रीय अनुसन्धान व्यूरो (सीआइबी) ले कीर्ते मुद्दामा अनुसन्धान सकेर सरकारी वकिल कार्यालय काठमाडौंमा प्रतिवेदन बुझाएलगत्तै बैंकिङ कसूरमा अनुसन्धानका लागि थप समय पाएको थियो । पाएको थप समयमा अनुसन्धान गर्दा सो प्रकरणमा बैंकिङ कसूर भएको नदेखिएसँगै सीइओ र डेपुटी सीइओ निर्दोष सावित भएका हुन् । यो प्रकरणमा किर्ते अन्तर्गतको अपराधमा भने यसअघि नै मुद्धा दायर भएको थियो । सोही मुद्धाको प्रारम्भिक फैसला सुनाउँदै जिल्ला अदालत काठमाण्डौले ३ प्रतिवादीलाई पुर्पक्षका लागि कारागार पठाउन आदेश दिएको छ भने एक प्रतिवादी एकलाख धरौटीमा रिहा भएका छन् । सो प्रकरणमा संलग्नताको अभियोगमा प्रहरीले कुमारी बैंकको वीरगञ्ज शाखाका कनिष्ठ सहायक सोनु ठाकुर, भ्यालुएटर राजेश चौरसिया, किर्ते कागजातका आधारमा कर्जा लिने एस कुमार महर्जन र मुक्तिलाल गौतमलाई ९सीआईबी०को टोलीले नियन्त्रणमा लिएको थियो। जिल्ला अदालतको आदेशअनुसार सोनु ठाकुर, मुक्तिलाल गौतम, एसकुमार महर्जनलाई पुर्पक्षका लागि बुधबार थुनामा पठाइएको छ। त्यस्तै, राजेश चौरसिया भने १ लाख रुपैयाँ धरौटीमा छुटेका सीआइबीका एसपी श्याम महतोले जानकारी दिए ।
राष्ट्रबैंकले समेत सो प्रकरणमा अनुसन्धान गरेको थियो । त्यसक्रममा समेत बैंकिङ कसूर हुने गरी बैंकको उच्च व्यवस्थापनले कुनै काम नगरेको देखिएको निश्कर्ष आएको थियो । गायक योगेश्वर अमात्यको बाराको विश्रामपुरस्थित १२ बिघा जग्गाको नक्कली कागजात बनाई १९ करोड ऋण कुमारी बैंकबाट लिएको खुलेको थियो । कुमारी बैंकका वीरगञ्ज शाखाका केही कर्मचारीको मिलेमतोमा १९ करोड ऋण लिएको देखिएपछि यो विषय बाहिरिएको थियो ।