काठमाडौं । मर्जरमा नगई बसेका बीमकहरुलाई नियामक निकाय नेपाल बीमा प्राधिकरणले हकप्रद शेयर निष्काशन गर्न दिने तयारी थालेको छ । निर्धारित समयमा आफ्नो निर्देशन अनुसार पूँजी पुर्याउन नसकेका जीवन तथा निर्जीवन बीमा कम्पनीहरुलाई हकप्रद शेयर निष्काशन गर्न दिन प्राधिकरण केही खुकुलो भएको हो ।
न्युनतम पूँजी पुर्याउन अब अन्तिम विकल्पको रुपमा प्राधिकरणले हकप्रदलाई लिएको छ । मर्जरमा गएर पनि चुक्ता पुँजी नपुगेका कम्पनीहरूलाई ३० प्रतिशतसम्म हकप्रद निष्काशन गर्न दिने तयारी प्राधिकरणले गरिरहेको छ । त्यति गर्दा पनि न्युनतम पूँजी कायम गर्न नसके कम्पनीहरुले शेयरधनीहरुलाई आफ्नो क्षमता अनुसारको बोनस शेयर वितरण गरेर पूँजी पुर्याउनेछन् ।
प्राधिकरणको निर्देशन अनुसार गत आर्थिक वर्षको अन्त्यसम्ममा जीवन बीमा कम्पनीहरुले ५ अर्ब र निर्जीवन बीमा कम्पनीहरुले २ अर्ब ५० करोड रुपैयाँ पुर्याउनु पर्ने थियो । तर प्राधिकरणले तोकेको समय सीमा सकिसक्दा पनि अधिकाँश जीवन तथा निर्जीवन बीमा कम्पनीहरुले न्युनतम चुक्ता पूँजी कायम गर्न नसकेका हुन् । बीमा प्राधिकरणको पछिल्लो तथ्यांक अनुसार सात वटा बीमा कम्पनीहरुले मात्रै न्युनतम चुक्ता पूँजी पुर्याएका छन् । तीन वटा जीवन बीमा कम्पनी र चार वटा निर्जीवन बीमा कम्पनी गरी सात वटा कम्पनीले मात्रै न्युनतम चुक्ता पूँजी पुयाएउन सफल भएका हुन् ।
जीवन बीमा तर्फ चुक्ता पूँजी पुर्याउनेमा नेपाल लाइफ इन्स्योरेन्स, हिमालयन लाइफ इन्स्योरेन्स र नेशनल लाइफ इन्स्योरेन्स रहेका छन् । यस्तै निर्जीवन बीमा तर्फ आइजीआई प्रडेन्सिलय इन्स्योरेन्स, सिद्धार्थ प्रिमियर इन्स्योरेन्स, शिखर इन्स्योरेन्स र सगरमाथा लुम्बिनी इन्स्योरेन्सले मात्रै न्युनतम २ अर्ब ५० करोड रुपैयाँ पूँजी पुर्याएका छन् । त्यस अनुसार अझै ११ वटा जीवन बीमा कम्पनी र १० वटा निर्जीवन बीमा कम्पनीहरुले न्युनतम चुक्ता पूँजी पुर्याउन सकेका छैनन् । प्राधिकरणले मर्जर पश्चात बनेका बीमा कम्पनीहरुले लागि ३० देखि ३५ प्रतिशतसम्म हकप्रद शेयर निष्काशन गर्न दिने तयारी गरेको हो ।