काठमाण्डौ । नेतृत्व अभावमा नेपाल धितोपत्र बोर्डमा अलपत्र परेका आइपीओ जारी गर्ने प्रस्तावका फाइल अब विस्तारै अघि बढ्ने भएका छन् । बोर्डका अध्यक्ष सन्तोषनारायण श्रेष्ठले विगत ११ महिनादेखि पाइपलाइनमै अलपत्र परेका दर्जनौं कम्पनीको प्राथमिक, थप र हकप्रद सेयर निश्कासनको प्रक्रिया चाँडै सुरु गरिने बताएका छन् ।
बिजशालासँग कुरा गर्दै अध्यक्ष श्रेष्ठले आफूले दैनिकजसो विभिन्न विभागहरुबाट ब्रिफिंग लिने काम गरिरहेको भन्दै सम्भवतः अर्को साताबाट अड्किएका प्राथमिक निश्कासन, थप निश्कासन र हकप्रदका कामहरु प्राथमिकताका आधारमा अगाडि बढाउने प्रष्ट पारेका छन् । अर्को साताबाट अड्किएका आईपीओहरु आउन कुरामा अध्यक्ष श्रेष्ठले विश्वासदिलाएका छन् । पछिल्लो ११ महिनादेखि ७६ वटा कम्पनीको करिब ५० अर्ब रुपैयाँ बराबरको आईपीओ पाइपलाइनमै अलपत्र छन् । यस्तै, १९ वटा कम्पनीको करिब १२ अर्ब रुपैयाँ बराबरको हकप्रद निश्कासनको प्रस्ताव समेत बोर्डमै थन्किएको छ। विभिन्न १० कम्पनीका ऋणपत्रको प्रस्ताव समेत अगाडि बढ्न सकेका छैनन् । करिब २९ अर्ब रुपैयाँ बराबरको ऋणपत्र निश्कासनको प्रस्ताव ११ महिनादेखि थन्किएको हो । यस्तै, विभिन्न कम्पनीबाट प्रस्ताव गरिएका करिब ९ अर्ब रुपैयाँ बराबरको १० वटा म्युचुअल फण्डका प्रस्ताव समेत अलपत्र अवस्थामा छन् । धितोपत्र बोर्डका अध्यक्ष नहुँदा कार्यबाहकहरुले आईपीओ निश्कासनमा चासो नदिंदा यस्तो अवस्था बनेको हो । धितोपत्र बोर्डका प्रवक्ता निरञ्जय घिमिरेले पनि जनशक्तिले भ्याएसम्म अब अड्किएका सबै काम सुरु गरिने प्रष्ट पारेका छन्।