काठमाडौँ । दुई जना संक्रमित हुँदा शुरु भएको लकडाउन छ हजार नजिक संक्रमित पुग्दा खुकुलो भएको छ । गत चैत्र ११ गतेदेखि शुरु भएको लकडाउन असार १ आंशिक रुपमा खुलेको हो । बुधबार बसेको मन्त्रिपरिषद् बैठकले अर्थतन्त्र चलायमान बनाउन र नागरिकको जीवनयापन सहज गराउन भन्दै लकडाउन आंशिक रुपमा खोल्ने निर्णय गरेको थियो । काठमाडौँमा सरकारले गत शुक्रबार देखि नै जोर बिजोर प्रणालीमा सवारी चलाउन दिइसकेको छ । आजदेखि विभिन्न कार्यालयहरु पनि खुल्दै छन् । आजदेखि खुल्ने कार्यालयहरु दुई सिफ्टमा सञ्चालन हुँदैछन् । बैक, वित्तीय संस्था, सहकारी, बीमा सेवा पनि आजबाट खुल्दैछन् । कोरोना भाइरस संक्रमण रोकथाम र नियन्त्रणका लागि सरकारले चैत ११ गतेदेखि निरन्तर देशव्यापी लकडाउन गर्दै आइरहेको थियो। आजदेखि सरकारी कार्यालय बिहान ८ बजेदेखि दिउँसो १ बजेसम्म एउटा सिफ्ट र दिउँसो १ बजेदेखि साँझ ६ बजेसम्म अर्को सिफ्टमा गरी दुई सिफ्टमा खुल्दै छन् । सार्वजनिक तथा जोरविजोर प्रणालीमा सञ्चालन हुने गरी निजी सेवा प्रदायक कार्यालयका श्रमिक तथा कर्मचारी ओसारपसार गर्न प्रयोग गरिने सवारी साधनसमेत आजबाट मात्रै सञ्चालन हुने भएका छन् । उक्त सवारीमा एक लहरमा एक जना यात्रु मात्रै राख्नुपर्ने छ। यात्रुले अनिवार्य रुपमा मास्क र सेनिटाइजरको व्यवस्था गर्नुपर्ने र सवारीलाई दैनिक निसङ्क्रमित गर्नुपर्ने छ। उक्त सवारीमा आफ्नो कार्यालयमा काम गर्ने मजदुर तथा कर्मचारी मात्रै राख्नुपर्ने छ।