काठमाडौं । कोरोनासँग तर्सिएको समाज सचेत हुँदै अगाडि बढ्ने तयारीमा छ । अब सामाजिक दूरी र कोरोनासँगको सुरक्षाका लागि आम नागरिक तयार भइसकेका छन् । संक्रमणको दर पनि घट्दै गएको छ भने त्यो भन्दा ठूलो कुरा कोरोनालाई जितेर घर फर्किनेको संख्या दोब्बर हुन थालेको छ । मानिसको ज्यान जानेक्रम पनि घट्दै गएको छ । कोरोनासँगको हाउगुजी भन्दा पनि त्योसँग कसरी सुरक्षित हुने भन्नेतिर आम नगारिक पुगिसकेका छन् । अब कोरोना पराजित हुनेमा विश्वास गर्न सकिने वातावरण बन्दै गएको छ ।
स्वास्थ्य क्षेत्रमा देखिएको आत्मविश्वास र स्वास्थ्यकर्मीको लगनशीलताले कोरोना अब नेपालमा पराजित हुने संकेत गरेको छ । बितेको २४ घण्टामा देशभर थप ९०२ जनामा कोरोनाभाइरस संक्रमण पुष्टि हुँदा २२ सय भन्दा बढीले कोरोनालाई पराजित गरिसकेका छन् । मंगलबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा जागेश्वर गौतमले हालसम्म कुल संक्रमितको संख्या ४८ हजार १३८ पुगेको जानकारी दिए । यस्तै पछिल्लो २४ घण्टामा २ हजार २८७ जना कोरोना संक्रमण मुक्त भएसँगै निको हुनेको कुल संख्या ३२ हजार ९६४ पुगेको छ।
यसैगरी देशभर सक्रिय संक्रमितको संख्या १४ हजार ८६८ रहेको छ । जसमा संस्थागत आइसोलेशनमा ८ हजार ५३ रहेका छन् भने होम आइसोलेशनमा ६ हजार ८१५ जना रहेका छन् । यस्तै आज १० हजार ६११ जनाको पीसीआर परीक्षण भएको छ । यसैगरी पछिल्लो २४ घण्टामा थप ६ जनाको कोरोनाबाट मृत्यु भएको छ । यससँगै मृतकको कुल संख्या ३०६ पुगेको छ।
