काठमाडौं ।आफूले पाएका सुविधा बेला मौका प्रयोग गरिरहनुपर्छ भन्ने ज्ञान हुन्थ्यो भने पक्कै पनि नेपाली युवाले बेला मौकामा आफ्नो स्वास्थ्य परीक्षण गर्ने थिए होला । या आफूलाई तन्दुरुस्त ठानेका युवाले १८ घण्टा खटिँदा पनि आफूलाई कमजोर नठानेकै कारण अनाहकमा ज्यान गुमाउनु परेको हो । दक्षिण कोरियामा रोजगारीको लागि गएकाहरुमध्ये गएको साउन १ गते यता चैत मसान्तसम्म २५ जना नेपालीको मृत्यु भएको छ । यो ९ महिनाको अवधिमा कोरियामा नेपालीको मृत्यु भएको सबैभन्दा धेरै हो । गत आर्थिक वर्षमा कोरियामा १२ जना नेपालीको मृत्यु भएको थियो । दक्षिण कोरियाका लागि नेपाली राजदूत ज्योति प्याकु‍र्यालका अनुसार कतिपय नेपालीको सडक दुर्घटना, औद्योगिक दुर्घटना र केहीको आत्महत्या कारण मृत्यु हुने गरे पनि धेरै नेपालीको मृत्युको कारण नै थाहा हुँदैन । अस्पतालहरुले मृत्युको स्पष्ट कारण नखुलाई ‘स्लिप डेथ सिन्ड्रोम’ भन्ने रिपोर्ट दिने गरेका छन् । त्यो भनेको सकुसल सुतेका तर विहान मृत भेटिनु हो । उनीहरुको कसरी मृत्यु भयो भन्ने कुरालाई अस्पताल थप स्पष्ट नपारी अज्ञात भन्ने रिपोर्ट दिने गरेका छन् । दक्षिण कोरियामा स्वास्थ्य बीमाअन्तर्गत हरेक कामदारलाई निःशुल्क स्वास्थ्य परीक्षणको सुविधा हुन्छ तर धेरै नेपाली कामदारले मलाई केही भएको छैन भन्दै हेलचेक्रयाईं गरि त्यो सुविधा नलिने प्रवृत्ति छ । दूतावासका अनुसार हाल कोरियामा काम गर्ने नेपाली श्रमिकको संख्या ५५ हजारभन्दा बढी छ।