काठमाडौं । मुलुक समस्यामा पर्दा मन फुकाउनेहरुको अझै कमी छैन । प्रधानमन्त्री दैवी प्रकोप उद्धार कोषमा साढे एक अर्ब भन्दा बढी रुपैयाँ जम्मा भएको छ । प्रधानमन्त्री तथा मन्त्रिपरिषद् कार्यालयले सार्वजनिक गरेको तथ्यांक अनुसार कोषमा एक अर्ब ७४ करोड ४७ लाख २७ हजार ६३४ जम्मा भएको हो । यो हिजो असोज ३० गतेसम्म दाखिला भएको रकम हो । कोषमा संस्थागत एवं व्यक्तिगत रूपमा हिजोसम्ममा विद्याधर मल्लिकसहित दश सङ्गठित संस्थाले रकम दिएका छन् । राहत कोषमा साल्ट ट्रेडिङ कर्पोरेशनले ६१ लाख रूपैयाँ, गैरआवासीय नेपाली सङ्गठनले ५१ लाख रूपैयाँ तथा राष्ट्रिय समाचार समितिले तीन लाख २६ हजार ३८ रूपैयाँ दाखिला गरेका छन् । यसका साथै, कोषमा रकम जम्मा गर्ने अन्य संस्थामा नेपाल प्रहरी श्रीमती सङ्घ, नेपाल इन्स्योरेन्स कम्पनी र विद्युत् उत्पादन कम्पनी लगायत छन् ।