काठमाडौं। स्वयंम्भूस्थित मनमोहन मेमोरियल कलेज तथा शिक्षण अस्पतालको आकस्मिक कक्ष बन्द भएको छ । बिहीबार राति अस्पतालको आकस्मिक कक्ष तोडफोड भएपछि सेवा बन्द गरिएको बताइएको छ । आकस्मिक कक्षमा खटिएका डाक्टर नर्स तथा सेकुरिटी गार्ड कुटिएका छन् । तोडफोड र कुटपिट पछि अहिले अस्पतालको आकस्मिक सेवा बन्द गरिएको छ ।
बिहीबार रानीवन र ढुंगेधाराका युवाबीच भलिवल खेल्ने क्रममा ग्याङ फाइट भएको थियो । त्यसै बेला घाइते भएका पाँच जना युवालाई उपचारका लागि मनमोहन अस्पताल लगिएको थियो । कुटने समूहको एक जना युवा पक्राउ परेपछि सोही समूहका अरु तीस चालिस जना युवा आएर घाइतेमाथि कुटपिट गरेको अस्पतालका निर्देशक डा. धर्म सुवेदीले बताए । एउटा समूहको पाँच जना घाइते भएपछि हामीकहाँ उपचारका लागि ल्याइएको थियो । सोही घाइतेलाई कुटन राति अर्को समूह आयो । आकस्मिक कक्षमा भिडन्त भयो ।
मेडिकल उपकरण तोडफोड गरियो । उपचारमा सहभागी डाक्टर नर्स तथा अन्य कर्मचारी, सुरक्षा गार्डमाथि समेत आक्रमण भयो, निर्देशक सुवेदीले भने । अस्पतालमा आएर आकस्मिक कक्षमै भिडन्त गर्ने र स्वास्थ्यकर्मीमाथि आक्रमण हुने, स्वास्थ्य सामग्रीको तोडफोड गर्ने लगायतको कार्यले स्वास्थ्य संस्था र स्वास्थ्यकर्मी माथि असुरक्षा बढेको भन्दै आफूहरुले आकस्मिक सेवा बन्द गरेको उनले बताए । झडप हुँदा आकस्मिक कक्षमा रहेको इसिजि मेसिन, टिचल फोर्सेव, एम्बु व्याग, टुल लगायतका थुप्रै सामानमा क्षति पुगेको अस्पतालले जनाएको छ । अस्पतालमा राती नौ बजे ३० – ४० जनाको समूह आएर करीब डेढ घण्टा वितण्डा मच्चाएका थिए । अस्पतालमा ५ जना प्रहरी रहेपनि उनीहरुले नियन्त्रण लिन नसकेपछि थप जनपद र सशस्त्र प्रहरी बल मगाइएको थियो । ठूलो संख्यामा सुरक्षाकर्मी आएपछि मात्रै उनीहरु भागेका थिए ।
