काठमाडौं । कोरोनाविरुद्धको अग्रमोर्चामा खटिने स्वास्थ्यकर्मीको जीवन रक्षा पहिलो शर्त हो । झापामा रहेको ओमसाई पाथीभरा अस्पतालले आफ्नो अस्पतालमा कार्यरत स्वाथ्यकर्मी तथा कर्मचारीको जीवन बीमा गराएको छ । अस्पतालका निर्देशक बालकुमार पोखरेलले यहाँ कार्यरत १४६ जना चिकित्सक, नर्स र कर्मचारीको एक वर्षे जीवन बीमा गराएको जानकारी दिए । कोभिड–१९ संक्रमणको त्रासको अवस्थामा समेत ज्यानको बाजी मारेर सर्वसाधारणको उपचारमा खटिएका स्वास्थ्यकर्मीहरुका लागि सिटीजन लाइफ इन्स्योरेन्स कम्पनीसँग वैशाख २० गतेदेखि लागू हुनेगरी जीवन बीमा गरिएको उनले जानकारी दिए । बीमावापत एक वर्षको रु ३ लाख ८३ हजार विमा कम्पनीलाई भुक्तानी गरिएको र यसबाट कार्यक्षेत्रमा खटिने सबै स्वास्थ्यकर्मीको मनोवल बढ्ने उनको धारणा छ । बीमामा भएको व्यवस्था अनुसार बीमा अवधिमा कालगतिले मृत्यु भएमा रु ५ लाख, कोरोना र अन्य दुर्घटनाबाट मृत्यु भएमा रु १० लाख रकम परिवारका सदस्यले पाउनेछन् । पोखरेलकाअनुसार अस्पतालले गरिब, दुःखी, बिपन्न वर्गका परिवारलाई केही राहत मिलोस् भनेर सहुलियतमा सेवा सुविधासमेत प्रदान गर्ने गरेको छ।