काठमाडौं । बीमितको मृत्युपछि पीडित आश्रित परिवारलाई झण्डै १ करोड २७ लाखको मृत्यु दाबी भुक्तानी भएको छ । कोरोनाबाट एक बीमितको मृत्यु भएपछि लाईफ इन्स्योरेन्स कर्पोशन (एलआईसी) नेपालले सवा करोड भन्दा बढि मृत्यु दाबी भुक्तानी गरेको छ ।
कम्पनीले नवपरासीका सुवासचन्द्र गिरीको मुत्यु पश्चात उनको श्रीमती अनितादेवी गिरीलाई १ करोड २६ लाख ९५ हजार रुपैयाँ परिवारलाई हस्तान्तरण गरेको हो । एलआईसी नेपाल नवलपरासी शाखाले एक कार्यक्रम आयोजना गरी मृतक गिरीको परिवारलाई बीमा दावी भुक्तानी गरेको हो ।
नवलपरासीमा ब्लक उद्योगी ३८ बर्षिय गिरीले ६ वर्ष पहिले २० लाख बीमाङ्कको, ४ वर्ष पहिले ३० लाख बीमाङ्कको र गत साउन ४ गते ५० लाखसहित कूल एक करोड बीमाङ्कको बीमा एलआईसी नेपालमा गराएका थिए । गिरीका परिवार बोनस सहित कूल १ करोड २६ लाख ९५ हजार रुपैयाँ नवलपरासी शाखा प्रबन्धक बालकृष्ण चौधरीले हस्तान्तरण गरेका हुन् ।
