काठमाडौं । कोरोना संक्रमणबाट मुक्त भएको भित्रराष्ट्र चीनले विश्वव्यापी रुपमा सहयोगको हात अघि बढाएको छ । सरकारले कोरोना भाइरस नियनत्रण तथा उपचारमा आवाश्यक पर्ने स्वास्थ्य उपकरण चीनबाट तीन दिन भित्र ल्याउने बताएको छ । स्वास्थ्य तथा जनसंख्यामन्त्री भानुभक्त ढकालले बुधबार मन्त्रालयमा आयोजित पत्रकार सम्मेलनमा उक्त कुरा बताएका हुन् । सरकारले कोरोना विरुद्ध प्रयोग हुने स्वास्थ्य उपकरण चीनबाट ल्याउने तयारी गरेको हो । त्यसरी ल्याइएका स्वाथ्य उपकरण तथा साधनहरु प्रदेश, जिल्ला र स्थानीय स्तरमा पठाउने स्वास्थ्यमन्त्री ढकालले जानकारी दिए । यसअघि स्वास्थ्यकर्मी तथा संस्थाहरुले स्वास्थ्य उपकरण अभावमा विरामीको उपचार गर्न नसकिएको जनाउँदै आएका थिए । सो उपकरण सम्बन्धित ठाउँमा पठाउन नेपाली सेना, सशस्त्र प्रहरी र नेपाल प्रहरीका साथै भौतिक पूर्वाधार तथा यातायात मन्त्रालयलाई जिम्मेवारी दिनेगरी समिति गठन गरिएको छ । त्यस्तै मन्त्री ढकालले पूर्वमा विराटनगर र पश्चिममा नेपालगञ्जबाट दैनिक रुपमा कोरोना आशंकितहरुको नमुना संकलन गर्ने व्यवस्था गरेको जनाएका छन् । त्यसका लागि हवाइजहाजको व्यवस्था मिलाएको सरकारले जनाएको छ । त्यस्तै सरकारले आजबाट धरानको विपी कोइराला अस्पतालमा कोरोना परीक्षणका लागि ल्याव सञ्चालनमा ल्याएको र त्यस्तो ल्याव सातै प्रदेशमा विस्तार गर्ने तयारी गरेको समेत जनाए ।
कोरोनाबारे सवै प्रवक्ता बन्ने प्रवृतिको अन्त्य गर्न भगवान कोइराला, लोचन कार्की, मना राई गणराज लोहनी, बसरुद्धिन अन्सारी र बसन्त चौधरी रहेको कमिटी गठन गरेको मन्त्रालयले जनाएको छ । डेलिकेटेड अस्पतालका रुपमा सञ्चालन गर्न लागिएको बलम्बुको सशस्त्र अस्पतालको अनुगमन गरी तत्काल सुचारु गर्ने प्रयत्न गरेको पनि स्वास्थ्य मन्त्रालयले जनाएको छ ।