काठमाण्डौ । नेपाल धितोपत्र बोर्ड (सेबोन) को अध्यक्षका लागि तीनजनाको सिफारिस गरिएको छ। अध्यक्षको नियुक्तिका लागि गठित छनोट तथा सिफारिस समितिको आज बसेको बैठकले सेबोन अध्यक्षका लागि रमेश हमाल, कृष्णराज पोखरेल र डा. गोपाल भट्टको नाम सिफारिस भएको छ । अब बस्ने मन्त्रिपरिषद्को बैठकले यी तीनजनामध्येबाट एकजनालाई सेबोनको अध्यक्षमा नियुक्त गर्नेछ ।
सेबोनको अध्यक्ष पदमा १५ जनाको आवेदन परेको थियो । तीमध्येबाट सिफारिस समितिले ५ जनाको नाम सर्टलिस्ट गरेको थियो। सिफारिस समितिले अन्तर्वार्ता र प्रस्तुतीकरणपछि सर्टलिस्टमा परेका ५ जनामध्ये निरज गिरी र खगेन्द्र कटुवाल सेबोनको अध्यक्ष हुने दौडबाट बाहिरिएका छन्।
सिफारिस गरिएकामध्ये सेबोनको अध्यक्षमा हमालको नियुक्ति हुने सम्भावना प्रबल छ । हमाल कांग्रेस सभापति एवं प्रधानमन्त्री शेरबहादुर देउवानिकटका व्यक्ति मानिन्छन् । सर्वोत्तम सिमेन्ट सेयरको भित्री कारोबार प्रकरणमा मुछिएपछि भीष्मराज ढुंगानालाई सरकारले गत असोजमा बर्खास्त गरेपछि सेबोनको अध्यक्ष पद लामो समयदेखि रिक्त छ। जसका कारण सेबोनबाट हुने कामकारबाही प्रभावित भएका छन्।