काठमाडौं । प्राकृतिक प्रकोपले अति नै दुःख दिएको सिन्धुपाल्चोकमा फेरि पहिरो खस्दा ५ परिवारका सदस्य बेपत्ता भएका छन् । सिन्धुपाल्चोकको जुगल गाउँपालिका वडा नम्बर २ लिदिको लामा टोलमा पहिरो जाँदा १३ वटा घर पुरिएकोमा पाँच घर परिवारका सदस्यहरु सम्पर्कविहीन छन् । शुक्रबार बिहान करिब ६ बजेतिर आएको पहिरोले घरहरु पुरिएका हुन् ।

सो स्थानमा १३ वटा घर पुरिएर नदेखिने अवस्थामा छन् भने पाँच घर परिवारका सदस्यहरु सम्पर्कमा आएका छैनन् । ती पाँच घर कति जना सदस्य थिए भन्ने पनि खुलेको छैन । १५ जना भने पहिरोबाट निस्किएर सुरक्षित स्थानमा बसेका छन् । सो क्षेत्रमा अझै २५–३० घरहरु जोखिममा छन् । अहिले पानी पर्न रोकिए पनि पहिरो झरिरहेकाले उद्धार टोली खटिन सकेको छैन । पहिरो झरिरहेकाले हेलिकोप्टर परिचालनको तयारी भइरहेको छ । फाइल तस्बिर