काठमाडौं । जोखिम व्यवस्थापन मार्गदर्शन लागू गर्ने तयारी बीमा समिति पुगेको कुरा समितिका अध्यक्ष चिरन्जीवि चापाँगाईले बताएका छन् । राष्ट्रिय बीमा संस्थानको ५३ औं वार्षिकउत्सवको अवसरमा अध्यक्ष चापागाईले यस्तो बताएका हुन् ।
बीमा कम्पनीहरुले सबै क्षेत्रको जोखिम बोक्ने भएकाले बीमा क्षेत्रमा संस्थागत सुशासन र जोखिम व्यवस्थापन सबैभन्दा महत्वपूर्ण हुने चापागाईको धारणा थियो । जोखिम व्यवस्थापन गर्न मार्गदर्शन लागू गर्नको लागि बीमा समितिले सबै पूर्वाधारहरु तयार गरिसकेको र आगामी आर्थिक वर्षको साउन १ गतेदेखि नै जोखिममा आधारित सुपरिवेक्षण र जोखिममा आधारित पूँजीलाई कार्यान्वयनमा ल्याउने गरी अघि बढेको उनले बताएका थिए ।
बीमा कम्पनीहरुको जोखिम पहिचान गरिसकेको र आगामी दिनमा बीमा सल्भेन्सी १ः१.५ को अनुपातमा तुलना गरेर सबैभन्दा बढी जोखिम हुने कम्पनीको पूँजी बढाउने या कारोबारमा रोक लगाउने विकल्पमा जाने जानकारी गराए । यस्तै उनले चालु आर्थिक वर्षको असार सम्ममा बीमाको दायरा ३० प्रतिशत र कुल ग्रहस्थ उत्पादनमा ३.५ प्रतिशत योगदान पुर्याउने दाबी गरेका थिए ।
