काठमाडौं । रिलायबल नेपाल लाइफ इन्स्योरेन्स कम्पनी लिमिटेडले नयाँ बोनसदर सार्वजनिक गरेको छ । नेपाल बीमा प्राधिकरणले कम्पनीको गत आवको आर्थिक स्थितिको लेखाजोखा र दायित्वको मूल्यांकनसम्बन्धी बीमांकीय प्रतिवेदन स्वीकृत गरेपछि नयाँ बोनसदर सार्वजनिक गरिएको हो । कम्पनीले ‘रिलायबल सावधिक जीवन बीमालेखमा’ योजनामा बीमा अवधिअनुसार न्यूनतम ५० रुपियाँदेखि ७५ रुपैयाँ प्रतिहजारका दरले बोनस दिने भएको छ । त्यस्तै, ‘रिलायबल सुलभ जीवन बीमालेख’ र ‘सुलभ बाल जीवन बीमालेख प्लस योजना’का बिमितले न्यूनतम २५ रुपैयाँदेखि ४१ रुपैयाँसम्म बोनस पाउनेछन् ।
त्यसैगरी ‘रिलायबल सजिलो जीवन बीमा’ (एकल तथा सीमित अवधि भुक्तानी) मा न्यूनतम २५ देखि अधिकतम २६ रुपैयाँसम्म बोनस दिने निर्णय गरेको छ । ‘लघु सावधिक जीवन बीमालेख’ (बीमा समिति) र ‘रिलायबल लघु सावधिक जीवन बीमालेख’मा बिमितले प्रतिवर्ष प्रतिहजार ३१ रुपैयाँदेखि ३५ रुपैयाँसम्म बोनस पाउनेछन् । ‘सावधिक तथा आजीवन बीमा योजना’मा ३० देखि ५०, ‘रिलायबल अग्रिम भुक्तानी सावधिक बीमा योजना’मा ५० देखि ५५ र ‘रिलायबल समुन्नति जीवन बीमा योजना’का बिमितलाई न्यूनतम २० रुपैयाँदेखि अधिकतम २३ रुपैयाँसम्म बोनस दिने कम्पनीले निर्णय गरेको छ । यसका साथै, ‘रिलायबल उच्च शिक्षा योजना’ (बालबच्चाको सावधिक बीमालेख) मा न्यूनतम ६० देखि अधिकतम ६५ रुपैयाँसम्म बोनस दिइनेछ कम्पनीले जनाएको छ ।
यो बोसनदर मृत्यु दाबी, पूर्ण वा आंशिक अवधि भुक्तानी दाबी, समर्पण दाबी, चुक्ता मूल्य तथा चालू बीमालेखमा समेत लागू हुने र अर्को बोनसदर सार्वजनिक नभएसम्म लागू हुने कम्पनीको भनाइ छ ।