काठमाडौं, असार ५ — नेपाली बजारमा शुक्रबार सुनको मूल्यमा उल्लेख्य गिरावट आएको छ। अघिल्लो कारोबार दिनको तुलनामा सुनको मूल्य प्रतितोला १० हजार ५०० रुपैयाँले घटेको हो।
नेपाल सुनचाँदी व्यवसायी महासंघका अनुसार छापावाल सुनको मूल्य आज प्रतितोला २ लाख ८६ हजार ७ सय रुपैयाँ कायम भएको छ। त्यस्तै, १० ग्राम सुनको मूल्य २ लाख ४५ हजार ८ सय रुपैयाँ निर्धारण गरिएको छ।
यसैगरी, चाँदीको मूल्य पनि घटेको छ। चाँदी प्रतितोला ३०५ रुपैयाँले सस्तो भई ४ हजार ६४० रुपैयाँमा कारोबार भइरहेको महासंघले जनाएको छ।
अन्तर्राष्ट्रिय बजारमा सुनको मूल्यमा आएको तीव्र गिरावटको प्रत्यक्ष प्रभाव नेपाली बजारमा परेको हो। विश्व बजारमा सुनको मूल्य २.३९ प्रतिशत अर्थात् १०३ अमेरिकी डलरले घटेको बताइएको छ।
विश्लेषकहरूका अनुसार अमेरिकी डलर मजबुत बन्दै जानु तथा अमेरिकी केन्द्रीय बैंक फेडरल रिजर्भले कडा मौद्रिक नीति कायम राख्ने संकेत दिनुले लगानीकर्ताको आकर्षण सुनबाट अन्य क्षेत्रमा सरेको छ। यही कारण अन्तर्राष्ट्रिय बजारमा सुनको मूल्य घट्दा नेपाली बजारमा पनि त्यसको असर देखिएको हो।
