काठमाडौं । नेपाल लाइफ इन्स्योरेन्सले हिमालयन रिइन्स्योरेन्सको शेयरधनी दिपक भट्टले नेपाल रिइन्स्योरेन्सको शेयर खरिद गर्न नेपाल लाइफ इन्स्योरेन्सको सहायक कम्पनीबाट ३७ करोड रूपैयाँ दुरूपयोग गरेको समाचारको खण्डन गरेको छ। कम्पनीले बिहीबार विज्ञप्ती जारी गर्दै भनेको छ, दिपक भट्ट वा धितोपत्र दलाल नं. ५५ सँग यस विषयमा नेपाल लाइफको कुनै संलग्नता नभएको र कारोबार समेत नगरेको सम्बन्धित सबैमा जानकारीको लागि अनुरोध गर्दछौं । केही दिन अगाडि हिमालयन रिइन्स्योरेन्स कम्पनी लिका आधारभूत शेयरधनी दिपक भट्ट (नागरिकता नं. १०७ कैलाली) ले दोस्रो बजारबाट नेपाल रिइन्स्योरेन्स कम्पनी लि लगायतका शेयर खरिद गर्न नेपाल लाइफ इन्स्योरेन्स कम्पनी लिका सहायक कम्पनीबाट ३७ करोड दुरुपयोग गरी धितोपत्र दलाल नं. ५५ भृकुटी स्टक ब्रोकर कम्पनी प्रालि मार्फत खरिद गर्दा भुक्तानी गरेको भन्ने समाचार प्रकाशन भएको भन्दै कम्पनीले खण्डन गरेको हो। प्रहरी हिरासतमा रहेका व्यवसायी दिपक भट्टले नेपाल रिको साधारण शेयर खरिद गर्न नेपाल लाइफको सहायक कम्पनीबाट रकम दुरूपयोग् गरेको भन्दै सम्पत्ति शुद्धिकरण विभागले नेपाल बीमा प्राधिकरणसँग जानकारी माग गरेको पत्र। कम्पनीले विज्ञप्तीमा लेखेको छ, नेपाल लाइफ इन्स्योरेन्स कम्पनी लिमिटेड सधैं प्रचलित कानून, नियामक निकायका मापदण्ड तथा संस्थागत सुशासनका सिद्धान्तहरूको पूर्ण पालना गर्दै आफ्नो व्यवसाय सञ्चालन गर्दै आएको व्यहोरा हाम्रा सम्पूर्ण सरोकारवालाहरुमा विनम्रतापूर्वक जानकारी गराउन चाहन्छौं ।