काठमाडौं। हिमालयन डिष्टिलरी लिमिटेडले चालु आर्थिक वर्षको दोस्रो त्रैमाससम्ममा २५ करोड ४० लाख खुद नाफा आर्जन गरेको छ। यो नाफा गत आर्थिक वर्षको सोही अवधिको तुलनामा ६ करोड ८२ लाख रुपैयाँ बढी हो। गत आर्थिक वर्षको पुस मसान्तसम्ममा कम्पनीले १८ करोड ५८ लाख रुपैयाँ नाफा कमाएको थियो।
पुस मसान्तसम्ममा कम्पनीले १ अर्ब ८ करोड रुपैयाँ बिक्रीबाट आम्दानी गरेको छ। यो गत आर्थिक वर्षको सोही अवधिको तुलनामा ४ करोड १४ लाख रुपैयाँ कम हो। हरेक वर्ष मदिराको अन्तः शुल्क दरमा वृद्धि हुने गरेकोले उपभोक्ताको क्रय शक्तिको तुलनामा उत्पादित स्वदेशी मदिरा महंगा हुन पुगेकोले मूख्य गरी २५ युपि र ३० युपि शक्तिका मदिराहरुको बिक्रीवतरणमा कमी आएको कम्पनीले जनाएको छ।
समीक्षा अवधिमा कम्पनीको उत्पादन खर्च २ करोड ६७ हजार घटेर ३ करोड ८९ लाख रुपैयाँ र बिक्री लागत ४ करोड २१ लाख घटेर ४६ करोड ४६ लाखमा सीमित भएको छ। ५७ करोड ८४ लाख रुपैयाँ चुक्ता पूँजी रहेको यस कम्पनीको प्रतिशेयर आम्दानी समीक्षा अवधिमा ८ रुपैयाँ ५३ पैसा घटेर ८७ रुपैयाँ ८३ पैसा कायम भएको छ। कम्पनीको उत्पादन खर्चसँगै अन्य खर्चहरु घटेका कारण खुद नाफामा वृद्धि देखिएको हो।
