दिल्ली। भारतीय बीमा बजारको सबैभन्दा ठूलो कम्पनी भारतीय जीबन बीमा निगम (एलआईसी)ले सर्वसाधारणमा सेयर विक्री गर्ने भएको छ । भारत सरकारले सन् २००९ देखि नै राजस्व घाटा कम गर्न सरकारी कम्पनीको सेयर बेच्दै आएको छ । भारत सरकारको स्वामित्वको कम्पनीमा अब सर्वसाधारणको पनि लगानी रहनेछ । भारतका वित्तमन्त्री निर्मला सीतारमणले आगामी आर्थिक वर्षको लागि ल्याएको बजेटमा सरकारी स्वामित्वका कम्पनीको सेयर विक्रीबाट २१ खर्ब भारु उठाउने लक्ष्य अनुरुप एलआईसीको सेयर बेच्न लागिएको हो ।
भारत सरकारले जीबन बीमा कम्पनीहरु राष्ट्रियकरण गर्दै सन् १९५६ मा बेग्लै ऐन ल्याएर एलआईसीको स्थापना गरेको थियो । जीबन बीमा कम्पनीहरु राष्ट्रियकरण गरेको ६४ वर्षपछि शतप्रतिशत सरकारी लगानीको कम्पनीको सेयर विक्री गर्ने तयारीमा भारत सरकार पुगेको हो ।
एलआईसीको ८ देखि १० खर्ब रुपैयाँ बराबरको सेयर भारत सरकारले बेच्न सक्ने अनुमान भारतीय मिडियाहरुले गरेका छन् । भारत सरकारले सेयर विनिबेसबाट उठाउने लक्ष्य राखेको २१ खर्ब भारुमध्ये एलआईसी र आईडीबीआई बैंकको सेयर विक्रीबाट ९ खर्ब रुपैयाँ उठाउने लक्ष्य राखेको बीबीसीले उल्लेख गरेको छ ।
भारतको जीबन बीमा बजारमा एलआईसीको सेयर हिस्सा ७० प्रतिशतभन्दा बढी रहेको छ ।
