जुम्ला । सत्याग्रह स्थगित गर्दै स्वास्थ्य शिविर चलाउन गाउँ जान थालेका डा. गोविन्द केसीलाई औषधि किन्नसमेत अवरोध गरिएको छ । शुक्रवार बिहान कर्णाली स्वास्थ्य विज्ञान प्रतिष्ठानका सुरक्षाकर्मीले ‘माथिको आदेश’ भन्दै फार्मेसीमा पस्न नदिएर अवरोध गरेको बताइएको छ । हाड जोर्नीसम्बन्धी दुई प्रकारको औषधि बाहिर नपाउने र प्रतिष्ठानको फार्मेसीमा मात्र पाउने भएकाले लिन जाँदा रोकिएको डा. केसीले बताए ।

कोरोना सङ्क्रमणमा सबैको आग्रहमा सत्याग्रह रोकेपछि सिञ्जा, पातारासीलगायत क्षेत्रमा जाने योजना बनाएको र रित्तै जानुभन्दा बिरामीका लागि औषधि लगेर जान लाग्दा भित्रै पस्न नदिएको उनको भनाई छ । विगत २ महिनादेखि कर्णालीमा रहेका डा। केसीलाई स्थानीय तह र प्रशासनले बिरामीको उपचार र स्वास्थ्य परीक्षणमानसमेत अवरोध गर्दै आएका छन् ।