काठमाण्डौ । कालिञ्चोक दर्शन लिमिटेडको आईपीओ भर्ने आज मंसिर २८ गते अन्तिम दिन रहेको छ। कम्पनीले गत मंसिर १४ गतेदेखि पहिलो चरणमा आयोजना प्रभावित स्थानीय र वैदेशिक रोजगारीमा गएका नेपालीका लागि आईपीओ बिक्री खुला गरेको थियो। यो आईपीओमा आज बैंकिङ समयम्म आवेदन दिन पाइने धितोपत्र बिक्री प्रबन्धक नबिल इन्भेस्टमेन्ट बैंकिङले जनाएको छ। कम्पनीले जारी पुँजी ६० करोडको २ प्रतिशतले हुने १ करोड २० लाख रुपैयाँबराबरको आईपीओ आयोजना प्रभावित स्थानीयलाई बिक्री खुला गरेको छ। जसअनुसार १०० अंकित दरका कुल १ लाख २० हजार कित्ता आईपीओ जारी गरिएको छ।
त्यसैगरी सर्वसाधारणमा निष्कासन हुने १० लाख ८० हजार कित्ता सेयरमध्ये १० प्रतिशतले हुन आउने १ लाख ८ हजार कित्ता सेयरमा भने वैदेशिक रोजगारीमा गाएका नेपालीले आवेदन पाउनेछन्। स्थानीयले न्यूनतम १० कित्तादेखि अधिकतम ४ हजार ९९० कित्ता र वैदेशिक रोजगारीमा गएकाले न्यूनतम १० कित्तादेखि १० हजार ८०० कित्तासम्म आवेदन दिन पाउनेछन्। दोलखा जिल्ला कालिन्चोक गाउँपालिका वडा नं। १ कुरीबाट आफ्नो सेवा प्रदान गरिरहेको कम्पनीले दोलखा जिल्लावासी सबैलाई आयोजना प्रभावित बासिन्दा मानी कम्पनीको आयोजना प्रभावित क्षेत्रमा स्थायी बासिन्दाका लागि निष्कासनमा आवेदन गर्न पाउने जनाएको छ। यसका लागि संकलन केन्द्रहरुका रुपमा नबिल इन्भेस्टमेन्ट बैंंकिङ लिमिटेडको काठमाण्डौ नक्सालस्थित कार्यालय, कालिन्चोक दर्शनको दोलखाको कुरीस्थित कार्यालय, मेगा बैंकका शाखाहरु काटाकुटी बाघखोर, चरीकोटा र मैनापोखरी तथा सेन्चुरी बैंकको सिंगटी शाखालाई तोकिएको छ।