काठमाडौं । सरकारको ड्रिम प्रोजेक्ट भ्रमण वर्ष औपचारिक रुपमा शुरु भएको झण्डै १ महिनापछि नेपाल पर्यटन बोर्डको प्रमुख कार्यकारी अधिकृत पाएको छ । आफ्नो रानजीतिक आस्थाका व्यक्ति छनोटमा नपरेका कारण सरकारले आलटाल गर्दै आएको बोर्डको प्रमुख कार्यकारी अधिकृतमा पर्यटन व्यवसायी डा. धनन्जय रेग्मीलाई नियुक्त गरेको हो ।

स्याङ्जामा जन्मिएका रेग्मी पर्यटन, जलवायु परिवर्तन तथा हिमताल विज्ञका रुपमा चिनिन्छन् ।

पर्यटन मन्त्रालयका सचिव केदारवहादुर अधिकारी संयोजकत्वको छनौट समितिले रेग्मीसहित हिक्मत ऐर र दिपक बस्ताकोटीलाई छनौट गरेको थियो । तीन उम्मेदवारमध्ये एक नम्बरमा रहेका रेग्मीलाई मंगलबार कार्यकारी अधिकृतमा नियुक्त गरेको हो । बोर्डको मंगलबार बसेको बैठकले छनौट समितिको सिफारिस बमोजिम सबैभन्दा धेरै अंक ल्याएका रेग्मीलाई सर्वसम्मत रुपमा नियुक्त गरेको हो । रेग्मी विद्यार्थी समयमा अनेरास्ववियुसँग नजिक मानिए पनि पार्टी राजनीतिमा कहिं कतै देखिएका पात्र होइनन् ।