भेनेजुएलामा शक्तिशाली भूकम्पपछि ४० हजारभन्दा बढी व्यक्ति सम्पर्कविहीन भएका छन्। भग्नावशेषमा पुरिएका नागरिकहरूको उद्धारका लागि सुरक्षाकर्मी तथा उद्धार टोलीहरू समयसँग प्रतिस्पर्धा गर्दै खोज तथा उद्धार अभियानमा जुटेका छन्।
भूकम्पपछि देशभर आपत्कालीन अवस्था घोषणा गरिएको छ। अन्तरिम राष्ट्रपति डेल्सी रोड्रिगेजले राष्ट्रिय आपत्काल घोषणा गर्दै प्रभावित क्षेत्रमा उद्धार तथा राहत कार्यलाई तीव्र बनाउन सबै सरकारी निकायलाई निर्देशन दिएकी छन्।
प्रारम्भिक विवरणअनुसार ७.२ र ७.५ म्याग्निच्युडका दुई शक्तिशाली भूकम्प एक मिनेटको अन्तरमा गएका थिए। तीमध्ये दोस्रो भूकम्प सन् १९०० यताकै भेनेजुएलामा आएको सबैभन्दा शक्तिशाली भूकम्प भएको अधिकारीहरूले बताएका छन्।
राजधानी काराकास र ला गुआइरा राज्य सबैभन्दा बढी प्रभावित भएका छन्। ती क्षेत्रमा १०० भन्दा बढी ठूला भवन भत्किएका छन् भने भग्नावशेषमुनि पुरिएका मानिसहरूको खोजी कार्य निरन्तर जारी छ। उद्धारकर्मीहरूले जीवित व्यक्तिको खोजीमा अत्याधुनिक उपकरण तथा खोजी कुकुरको समेत प्रयोग गरिरहेका छन्।
यस्तै, राजधानी काराकास नजिकै रहेको माइकेटिया अन्तर्राष्ट्रिय विमानस्थलमा गम्भीर क्षति पुगेपछि विमानस्थल अनिश्चितकालका लागि बन्द गरिएको छ। अधिकारीहरूले प्रभावित क्षेत्रमा थप पराकम्पनको जोखिम रहेकाले सर्वसाधारणलाई सतर्क रहन आग्रह गरेका छन्।
