जनकपुर । प्रदेश २ को सबैभन्दा ठूलो समस्याको रुपमा रहेको छोरीहरुको शिक्षा र सुरक्षाका लागि थालिएको बेटी पढाउ, बेटी बचाउ अभियान अन्तर्गतको छोरी शिक्षा बीमाको रकम एक लाखबाट बढाएर ३ लाख पुरुयाइएको छ । २०७५ माघ १ पछि जन्मेको छोरीहरुको १ लाखको शिक्षा बीमा गर्ने घोषणा गरेको प्रदेश सरकारले सो रकमलाई तीन लाख पुर्याएको हो । मुख्यमन्त्री लालबाबु राउतले २०७५ माघ १ गते पछि प्रदेशमा जन्मिएकी छोरीहरु अब ३ लाख पाउने घोषणा गरेका छन् ।
स्थानीय सरकारहरुलाई समेत यस अभियानमा सहयोग गर्न आग्रह गर्दै मुख्यमन्त्री राउतले यो रकम लाई २० वर्षमा २० लाख पुर्याउने लक्ष्य रहेको बताउनुभयो । छोरी शिक्षा बिमा अन्तर्गत हालसम्म करिब १५ हजार छोरीहरुको बीमा प्रदेश सरकारले गरिसकेको छ । बीमा गराइसकेका छोरीहरुले समेत यो सुविधा पाउने छन् ।
अति विपन्न दलित तथा मुस्लिम परिवारका कक्षा १ देखि ८ सम्मका छात्राहरुलाई प्रति महिना पाँचसय दिने योजना पनि प्रदेश २ सरकारले बनाएको छ ।