टोकियो । नेपालीहरुको बाक्लो उपस्थिति रहेको जापानमा कोरोना भाईरस (कोभिड १९) संक्रमणबाट ज्यान गुमाउनेको संख्या ७ पुगेको छ । बिहिबार अपरान्हसम्ममा संक्रमितको संख्या ९ सय पुग्दा संक्रमितको संख्या बढ्ने क्रम रोकिएको छैन ।
संक्रमित मध्ये ५१ जनाको अवस्था चिन्ताजनक रहेको छ । स्वास्थ्य मन्त्री काचुनोबु कातोलाई उदृत गर्दै एनएचके न्युज अनलाईनले उल्लेख गरे अनुसार गम्भिर अवस्थामा रहेका मध्ये ३६ जना योकोहामाको डाईमण्ड प्रिन्सेस पानी जहाँजबाट उद्दार गरिएकाहरु रहेका छन् । कोरोना भाईरसबाट सबैभन्दा बढी प्रभावित जापानको उत्तरी क्षेत्र होक्काईदो भएको छ । ४१ जना संक्रमित व्यक्ति भेटिएको सो क्षेत्रमा एकजनाले ज्यान गुमाईसकेका छन् ।
विद्यालयहरु बन्द गरिएका छन् भने पर्यटकिय सो क्षेत्र सुनसान हुन थालेका छन् । होक्काईदोपछी टोकियो कोरोना भाईरसको मारमा परेको छ । ३६ जना संक्रमित भेटिंदा थपिनेक्रम रोकिएको छैन । यसैगरि आईचि प्रिफेक्चरमा २५ र खानागावा प्रिफेक्चरमा १८ जना कोरोना भाईरसका संक्रमित भेटिएको जापानको स्वास्थ्य मन्त्रालयले तथ्यांक सार्वजनिक गरेको छ ।
जापानका स्वास्थ्य मन्त्री कातोका अनुसार कोरोना भाईरसबाट संक्रमित भएका ३२ जना उपचारपछि निको भएर घर फर्कीएका छन् । तर उपचारपछि पनि संक्रमण बल्झिने खतरा रहेको बताईरहँदा एकजना पूर्व संक्रमितमा फेरी भाईरसको संक्रमण पाईएपछि अस्पताल भर्ना गरिएको छ ।
