काठमाडौँ । विश्व समुदाय कोरोनाविरुद्ध लडिरहेको र नेपाल पनि कोरोनासँगको युद्धमा रहेका बेला बेमौसमी रुपमा ल्याएको अध्यादेशको चौतर्फी आलोचना भइरहेको बेला प्रधानमन्त्री केपी शर्मा ओली अध्यादेश फिर्ता लिन सकारात्मक देखिएका छन् । बिहीबार बिहान नेकपा अध्यक्ष पुष्पकमल दाहासँगको भेटमा उनले अध्यादेशले नकारात्मक विवाद सिर्जना गरेको भन्दै आफू फिर्ता लिन तयार भएको संकेत गरेका हुन् । प्रधानमन्त्रीले पार्टीका शीर्ष नेता र निकट कानुन व्यवसायीहरुसँग यस विषयमा छलफल पनि थालेका छन्। बिहीबार बिहानै उनले पार्टीका बरिष्ठ नेता माधवकुमार नेपाललाई पनि भेट गरेका छन् । संविधानको धारा ११४ को उपधारा २ (ख)मा सरकारको सिफारिसमा राष्ट्रपतिले अध्यादेश खारेज गर्न सक्ने व्यवस्था छ। राष्ट्रपति कार्यालयले पनि बिहीबार नै केही कानुन व्यवसायीलाई अध्यादेश फिर्ता लिने बारे छलफल गरेको छ ।