काठमाडौं । सामान्य अवस्थामा पनि सडकमा पहिलो प्राथमिकता पाउने एम्बुलेन्स चालकको अवस्था कस्तो छ भनेर खासै अनुगमन हुँदैनथ्यो । अहिले त झन महामारीको अवस्था । यो बेला एम्बुलेन्स चालकको अवस्था के कस्तो छ भनेर ट्राफिक प्रहरीले सोधीखोजी गर्ने कुरै भएन । खाली बाटोमा मादक पदार्थ सेवन गरेर एम्बुलेन्स हुइँक्याउँदा गौशलामा दुर्घटना भयो । बिहीबार दिउँसो बा८६ ६९२८ नम्बरको एम्बुलेन्सले बा १० च ८५१३ नम्बरको ग्राण्डी अस्पतालको कारलाई ठक्कर दिएको थियो । दुर्घटनापछि चेकजाँचका क्रममा एम्बुलेन्स चालक मोरङ, पथरीका ३६ वर्षीय रामबहादुर चौधरीले मापसे गरेर सवारी चलाएको पाइएको छ । साथै उनीसँग सवारी चालक अनुमति पत्र समेत नभएको महानगरीय ट्राफिक प्रहरी महाशाखाले जनाएको छ । दुर्घटनामा कुनै मानवीय क्षति भने भएको छैन । दुवै सवारी र चालक गौशाला प्रहरीको नियन्त्रणमा छन् ।