काठमाडौं । नेपाल जीवन बीमक संघले नेपालका सबै १९ वटै जीवन बीमा कम्पनीमा कार्यरत कर्मचारीहरुको लागि आचारसंहिता बनाउने तयारी गरेको छ । व्यवसायलाई मर्यादित बनाउन आचारसंहिता लागू गर्न लागिएको बताइएको छ ।
पछिल्लो समय जीवन बीमा कम्पनीहरुमा कर्मचारीहरुको ओहोरदोहोर बढेपछि जीवन बीमक संघले आचार संहिताद्वारा व्यवस्थित खोजेको हो । आचारसंहिता उल्लंघन गर्नेहरु माथि कस्तो कारवाही गर्ने भन्ने सम्बन्धमा पनि छलफल भएको छ ।
संघले आचारसंहिताको मस्यौदा बनाएर छलफल समेत सुरु गरिसकेको बताइएको छ । जीवन बीमा कम्पनीहरुमा सुशासन कायम गर्न तथा रचनात्मक र नतिजामुखी परिणाम दिन आचार संहिता लागू गर्न लागिएको जीवन बीमक संघका अध्यक्ष शिवनाथ पाण्डेले बताएका छन् । केही चरणको छलफलपछि १९ वटै बीमा कम्पनीका सिईओहरुको सहमतिमा आचारसंहिता लागू हुनेछ ।
पछिल्लो पटक जीवन बीमा कम्पनीका उच्च पदस्थ कर्मचारीदेखि तल्ला तहका कर्मचारीहरु समेत पद र आर्थिक प्रलोभनमा परेर कम्पनी चहार्ने क्रम बढेपछि आचार संहिताले एउटा मापदण्ड बनाउन लागिएको हो । असोज १ गते बसेको बीमक संघको बैठकमा आचार संहिताको मस्यौदामाथि प्रारम्भिक छलफल भएको छ ।
कम्पनी र कर्मचारीहरुलाई अधिकतम छ वटा आचार संहिताले बाँध्ने प्रस्ताव गरिएको छ । प्रस्तावित आचार संहितामा अधिकृत वा सो भन्दा माथिका कर्मचारीको लागि राजिनामा स्वीकृत भईसकेपछि एक महिना कुलिङ समय राख्ने प्रस्ताव राखिएको छ भने राजिनामा स्वीकृत नभएको अवस्थमा राजिनामा दिएको ४५ दिनपछि मात्रै नयाँ कम्पनीमा जान पाइने प्रावधान तय गरिएको छ ।
यसैगरी कर्मचारीहरुको कार्य अनुभवको आधारमा दुई वर्षभन्दा कम कार्यअनुभव भएका कर्मचारीहरुलाई सोही पदमा मात्रै अर्को कम्पनीले नियुक्त गर्ने पाउने छ भने दुई वर्षभन्दा बढि काम गरिसकेको अवस्थामा मात्रै एक तह बढुवा गरी नियुक्त गर्न पाउने प्रस्ताव गरिएको छ । अधिकृत भन्दा तल्लो तहका कर्मचारीलाई कुलिङ समय नराखिए पनि राजिनामा दिई बुझबुझारथ गरी क्लीयरेन्स लिएपछि वा छोडेको कम्पनीमा राजिनामा दिएको १५ दिनपछि मात्रै नयाँ कम्पनीले नियुक्त गर्न सक्ने व्यवस्था मिलाइएको छ । आर्थिक हिनामिना गरेको प्रमाणित भई कारवाहीमा परेका कर्मचारीहरुलाई कुनै पनि जीवन बीमा कम्पनीहरुले नियुक्ती दिन पाउने छैन।
