काठमाडौं । कुनै पनि महामारीको जोखिम बहन बीमा कम्पनीले नगरे पनि बीमा समितिको पहलमा विश्वव्यापी महामारीको रुपमा फैलिएको कोरोना भाइरस संक्रमणको जोखिम बीमा कम्पनीले बहन गर्न थालेका छन् । नेपालमा २० वटा निर्जिवन बीमा कम्पनी चालू अवस्थामा रहे पनि हालसम्म १७ वटा बीमा कम्पनीले मात्रै कोभिड १९ बीमा लेख बिक्री गरेका छन् ।
बीमा लेख शुरु भएको पाँच दिनमा ४१ लाखको बीमा पोलिसी बिक्री भइसक्दा अजोड इन्स्योरेन्स सबैभन्दा अगाडि देखिएको छ भने अजोजलाई आईजीआई इन्स्योरेन्सले पछ्याइरहेको छ । पाँच दिनको तथ्यांक हेर्दा बीमा समिति, नेपाल बीमक संघको सहकार्यमा ल्याइएको कोरोना बीमा पोलिसीको बिक्री उत्साहप्रद रहेको पाइएको छ । तथ्याङ्क अनुसार ५ दिनसम्म निर्जिवन बीमा कम्पनीहरुले ४ सय ६९ वटा कोरोना बीमा पोलिसी बिक्रि गरिसकेका छन् ।
हाल संचालनमा रहेको निर्जिवन बीमा कम्पनीहरुले ५ दिनसम्ममा ७ हजार ४ सय १२ जना बीमितको रक्षावरण गरेका छन् । यो बीमा लेख अधिकांश कर्पोरेट कम्पनी र अस्पतालहरु खरिद गरेका छन् । बीमा समितिले आईतबार मात्रै कोडिभ १९ बीमालेखको औपचारिक रुपमा सुरुवात गरेको थियो ।
समितिका अध्यक्ष चिरञ्जीवी चाँपागाई आफैंले कोरोना बीमा योजना खरिद गरेर यो बीमालेख सार्वजनिक गरेका थिए भने बीमा समितिले बीमा समितिमा आवद्ध भएका ८० जना कर्मचारीहरुको सामूहिक कोरोना बीमा गरेको थियो । समितिले यस बीमा योजनाको लागि निर्जिवन बीमा कम्पनीहरुलाई जिल्ला तोकेरै अभियानमा रुपमा बीमा योजना अघि बढाउन निर्देशन दिएको छ । सोही बमोजिम कम्पनीहरु आफ्ना कार्यक्षेत्रमा खटिएको बीमक संघले जनाएको छ ।
